Spotify 2025 yilda HiFi xizmatini ishga tushiradi
Spotify kompaniyasi yuqori sifatli, sifat yo‘qotilmasdan musiqa tinglash imkonini beruvchi yangi xizmatni ishga tushirmoqchi. Bu haqida Zamin.uz xabar berdi.
Bu xizmat “HiFi” nomi bilan tanilgan bo‘lib, foydalanuvchilarga studiya yozuviga yaqin, CD darajasidagi audio sifatini taqdim etadi. Yangi xizmat 2025 yil oxirigacha joriy etilishi rejalashtirilgan.
Lossless formatidagi musiqa tinglash orqali foydalanuvchilar musiqa sifatining maksimal darajasidan bahramand bo‘la oladi. Bu xizmat uchun alohida obuna tizimi – “Supremium” yoki unga o‘xshash yangi tariflar ishlab chiqilishi mumkin.
Hozirgacha Apple Music, Amazon Music va Tidal kabi boshqa striming platformalari shunday imkoniyatni taqdim etgan edi. Spotify esa bu borada biroz kechikib, foydalanuvchilar va ekspertlar tomonidan tanqidga uchragan.
Endilikda kompaniya yuqori sifatli musiqani keng ommaga taqdim etish uchun tayyorgarlik ko‘rmoqda. Bu yangilik musiqa ixlosmandlari uchun katta ahamiyatga ega bo‘ladi.
