O‘zbekistonda iPhone 17 uchun 80 kun ishlash kerak
Tenscope tahlilchilari dunyoning turli mamlakatlarida yashovchi odamlar 256 gigabaytli bazaviy iPhone 17 ni sotib olish uchun qancha vaqt mehnat qilishi kerakligini aniqladi. Bu haqda Zamin.uz xabar berdi.
Ushbu taqqoslash natijalari daromad va yashash darajasi mamlakatlarda qanday farq qilishi haqida aniq tasavvur berdi. Ma’lumotlarga ko‘ra, Yevropaning eng boy davlatlaridan biri hisoblangan Lyuksemburg va Shveysariyada yangi Apple smartfonini sotib olish uchun atigi uch kun ishlash kifoya qiladi.
Shuningdek, Amerika Qo‘shma Shtatlari, Belgiya, Daniya, Niderlandiya va Norvegiyada ham o‘rtacha to‘rt kunlik mehnat yetarli bo‘ladi. Biroq rivojlanayotgan mamlakatlarda vaziyat boshqacha.
Masalan, Hindistonda iPhone 17 olish uchun 160 kun ishlash talab etiladi. Filippinda bu ko‘rsatkich 101 kun, Vetnamda 99 kun, Turkiyada 89 kun, Braziliyada esa 77 kunni tashkil etadi.
O‘zbekiston bo‘yicha aniq ma’lumotlar mavjud emas, ammo taxminiy hisob-kitoblarga ko‘ra, 256 gigabaytli bazaviy iPhone 17 O‘zbekistonda 23-sentyabrdan boshlab 1300 AQSH dollari atrofida sotuvga chiqishi kutilmoqda. 2025-yilning birinchi yarmida mamlakatimizda o‘rtacha oylik ish haqi 5 million 982 ming so‘m, ya’ni taxminan 480 dollarni tashkil etdi.
Bu kunlik 16 dollar daromadga to‘g‘ri keladi. Shu asosda hisoblaganda, O‘zbekistonda o‘rtacha daromadga ega inson uchun iPhone 17 sotib olish kamida 80 kunlik mehnat talab qiladi.
Demak, Yevropaning boy davlatlarida yangi iPhone’ni bir haftadan kam vaqt ichida xarid qilish mumkin bo‘lsa, O‘zbekistonda bu qurilmaga ega bo‘lish ko‘p oylik ish haqining yig‘ilishini talab etadi. Bu holat mamlakatlar o‘rtasidagi iqtisodiy imkoniyatlar va turmush darajasidagi katta farqni yana bir bor ko‘rsatadi.
