Albaniyada ilk sun’iy intellekt vaziri ish boshladi
Albaniya hukumati tarkibida ilk bor sun’iy intellekt vaziri lavozimiga tayinlangan bot Diella parlamentda o‘zining ilk nutqini berdi. Bu haqda Zamin.uz xabar berdi.
Yangi tayinlangan vazir ekran orqali deputatlar oldiga milliy alban libosidagi ayol qiyofasida chiqdi va uch daqiqalik murojaatida konstitutsiyaning asosiy tamoyillarini eslatdi. Diella nutqida xalq xizmatiga mo‘ljallangan institutlar haqida so‘zlab, qonun insonning xromosomasi, qoni yoki jismoniy mavjudligiga emas, balki mas’uliyat, hisobdorlik, shaffoflik va barcha fuqarolar uchun teng imkoniyatlarga asoslanganini ta’kidladi.
U shuningdek, har qanday inson hamkasbidan kam emas, balki ba’zan undan ham ko‘proq darajada ifoda eta olishini qayd etdi. Sun’iy intellekt vaziri o‘z vazifasini odamlarning ishini egallash deb emas, balki ularga yordam beruvchi va qo‘llab-quvvatlovchi mexanizm sifatida ko‘rishini bildirdi.
Ma’lumot uchun, dunyodagi birinchi sun’iy intellekt vaziri sifatida Diella o‘tgan hafta Albaniya bosh vaziri Edi Rama tomonidan jamoatchilikka taqdim etildi. Uning so‘zlariga ko‘ra, Diella alban tilida “quyosh” ma’nosini anglatadi va davlat xaridlari sohasida faoliyat yuritadi.
Rejaga ko‘ra, davlat xaridlarining butun jarayoni bosqichma-bosqich sun’iy intellekt nazoratiga o‘tkaziladi. Albaniyaning bu qadami nafaqat mamlakat tarixida, balki butun dunyoda davlat boshqaruvining yangi bosqichi sifatida qabul qilinmoqda.
