1FIT kompaniyasiga reklama uchun jarima qo‘yildi
Raqobat qo‘mitasi axborot xizmatining ma’lumotiga ko‘ra, 1FIT MCHJga nisbatan reklama qonunchiligi talablarini buzganligi uchun moliyaviy jarima qo‘llandi. Bu haqda Zamin.uz xabar berdi.
Monitoring jarayonida kompaniyaning ijtimoiy tarmoqlarda e’lon qilingan reklama roliklari va bannerlarida haqiqatdan ortiqcha, bo‘rtib ko‘rsatilgan ma’lumotlar aniqlangan. “Reklama to‘g‘risida”gi qonunga muvofiq, noto‘g‘ri yoki insofsiz reklama sifatida baholangan bunday holatlar taqiqlanadi.
Shu sababli, Raqobat qo‘mitasi huzuridagi maxsus komissiya 1FITga nisbatan ish qo‘zg‘atdi va moliyaviy jazo qo‘llash qarorini qabul qildi. Kompaniyaga shuningdek, qonun buzilishlarini bartaraf etish va kelgusida shunga o‘xshash holatlarga yo‘l qo‘ymaslik bo‘yicha rasmiy ko‘rsatma berildi.
Agar kompaniya komissiya qarori bilan rozi bo‘lmasa, u holda Raqobat qo‘mitasi huzuridagi Apellyatsiya kengashiga yoki sudga murojaat qilish huquqiga ega ekanligi ma’lum qilindi. Bu qaror reklama sohasida qonuniylikni ta’minlash va iste’molchilar huquqlarini himoya qilish maqsadida qabul qilingan.
