iOS 26 adaptiv quvvat rejimi bilan batareyani tejaydi
Apple kompaniyasi yaqinda taqdim etgan iOS 26 operatsion tizimida foydalanuvchilar uchun muhim yangiliklardan biri – Adaptiv quvvat rejimi hisoblanadi. Bu haqda Zamin.uz xabar berdi.
Ushbu funksiya ayfon foydalanuvchilariga batareya quvvatini tejash imkonini beradi. Adaptiv quvvat rejimi fon jarayonlarni aqlli boshqarish orqali ortiqcha energiya sarfini kamaytiradi va faqat tizim ortiqcha quvvat sarfini aniqlaganda avtomatik ravishda faollashadi.
Bu esa smartfonning batareyasi uzoqroq ishlashiga yordam beradi. Yangi tizim yordamida odatda foydalanuvchilar kuniga qo‘shimcha bir soatgacha ishlash vaqtini qo‘lga kiritishi mumkin.
Agar telefon yengil rejimda ishlatilsa, bu vaqt ikki soatgacha oshishi mumkin. Shunga qaramay, ayrim holatlarda adaptiv quvvat rejimining ta’siri sezilmasligi ham mumkin.
Shuningdek, yaqinda taqdim etilgan iPhone 17 Air modeli kichik batareyaga ega bo‘lsa-da, avtonom ishlash ko‘rsatkichlari yaxshi darajada. Adaptiv quvvat rejimi bu model uchun ham yordam beradi, biroq mutaxassislar bu funksiyani asosiy quvvatni tejash vositasi deb hisoblamaydi.
Bundan tashqari, iOS 26 tizimidagi yana bir muhim yangilik – Apple Intelligence funksiyasi faqat iPhone 15 Pro va undan yuqori modellarda ishlaydi. Eski modellarda bu imkoniyat mavjud emas.
Yangi iPhone 17 seriyasida esa Adaptiv quvvat rejimi sukut bo‘yicha avtomatik yoqilgan holda keladi. Bu yangiliklar foydalanuvchilarga qulaylik va batareya samaradorligini oshirishga xizmat qiladi.
