Yandex Alisani o‘zbek tilida ishga tushirdi

Yandex Uzbekistan ikki tilli sun’iy intellekt yordamchisi — Alisani o‘zining aqlli ovoz qurilmalarida o‘zbek tilida ham ishlashi uchun ishga tushirdi. Bu haqda Zamin.uz xabar berdi.

Endilikda foydalanuvchilar Alisaga o‘zbek tilida savollar berishi mumkin va u rus yoki o‘zbek tilida javob qaytaradi. Alisa Yandex Uzbekistan tomonidan maxsus ishlab chiqilgan til modeli asosida faoliyat yuritadi.

Ushbu modelni yaratishda professional filologlar, muharrirlar hamda O‘zbekistonning 13 hududidan 300 dan ortiq foydalanuvchi o‘z hissasini qo‘shdi. Alisani o‘zbek tilida ishlatish uchun “Dom s Alisoy” ilovasida “Virtual yordamchi” bo‘limiga kirib, “Assistent tili”dan qurilmani tanlab, “O‘zbekcha + Ruscha” variantini belgilash zarur.

Shu yo‘l bilan foydalanuvchilar o‘zbek tilida Alisa bilan qulay va samarali muloqot qilish imkoniga ega bo‘ladilar hamda zamonaviy texnologiyalardan yanada keng foydalanishlari mumkin. Bu yangilik o‘zbek tilida sun’iy intellekt xizmatlarini rivojlantirishga xizmat qiladi.