Beats Powerbeats Fit yangi sport naushniklarini taqdim etdi
Beats kompaniyasi Powerbeats Fit nomli yangi simsiz sport naushniklarini taqdim etdi. Bu haqda Zamin.uz xabar berdi.
Ushbu yangi model Beats Fit Pro o‘rnini egallaydi va Powerbeats seriyasiga qo‘shilgan. Asosiy yangiliklardan biri – yaxshilangan ergonomik dizayn bo‘lib, eshitish qurilmasining “qush qanoti” shaklidagi tutqichi 20 foizga elastikroq qilindi.
Bu esa naushnikni qulayroq va ishonchliroq ushlash imkonini beradi. Zaryadlovchi quti oldingisiga nisbatan 17 foiz kichikroq bo‘lib, endi uch emas, to‘rt turdagi yostiqchalar bilan ta’minlangan.
Naushniklar va zaryadlovchi quti IPX4 standartiga muvofiq himoyalangan, ya’ni ular yomg‘ir va terga chidamli, biroq suzish uchun mos emas. Powerbeats Fit funksiyalari orasida Apple H1 chipi, faol shovqin yutilishi, shaffoflik rejimi, moslashuvchan ekvalayzer hamda shaxsiylashtirilgan fazoviy audio mavjud.
Ularning batareya quvvati 6 soatga yetadi, faol shovqin yutilishi o‘chirilganda esa 7 soatgacha ishlash imkonini beradi. Zaryadlovchi quti bilan esa umumiy ishlash vaqti 30 soatni tashkil etadi.
Fast Fuel texnologiyasi yordamida 5 daqiqalik zaryad bilan 1 soatlik musiqa tinglash mumkin. Android foydalanuvchilari uchun ham ayrim funksiyalar mavjud, jumladan faol shovqin yutilishi, shaffoflik rejimi, moslashuvchan ekvalayzer, fazoviy audio va Dolby Atmos.
Shuningdek, Beats ilovasi orqali tezkor ulanish imkoniyati taqdim etilgan. Powerbeats Fit naushniklari 30 sentyabrda 200 AQSh dollari narxda sotuvga chiqariladi va to‘rt xil rangda – Jet Black, Gravel Gray, Spark Orange hamda Power Pink ranglarida taqdim etiladi.
