Buyuk Britaniya Apple’dan iCloud ma’lumotlariga kirishni so‘radi

Buyuk Britaniya Ichki ishlar vazirligi sentabr oyining boshida Apple kompaniyasiga yangi texnik talabnoma yubordi. Bu haqda Zamin.uz xabar berdi.

Ushbu talabnoma doirasida Apple’dan Britaniya foydalanuvchilarining shifrlangan iCloud zaxira ma’lumotlariga kirish imkonini taqdim etish so‘ralmoqda. Bu haqda Financial Times nashri ma’lumotlariga tayangan holda Rozetked xabar berdi.

2025 yil yanvarida Buyuk Britaniya hukumati shifrlangan foydalanuvchi ma’lumotlariga global miqyosda kirishni nazarda tutuvchi hujjatni e’lon qilgan edi. Apple ushbu qarorga qarshi apellyatsiya bergan va natijada Buyuk Britaniyada uzluksiz shifrlangan ma’lumotlarni himoya qiluvchi Advanced Data Protection funksiyasini vaqtincha o‘chirib qo‘ygan edi.

Avgust oyida AQSh Milliy razvedka direktori Tulsi Gabbard Britaniya hukumati bu talabnomani AQSh bosimi sabab qaytarib olganini bildirgan. Biroq Financial Times manbalarining ma’lumotlariga ko‘ra, hozirda AQSh bosim o‘tkazmayapti va Buyuk Britaniya o‘z rejasini qayta ishga tushirgan.

Huquqni himoya qiluvchi Privacy International tashkiloti ma’lumotlarga faqat bitta davlat uchun kirish imkonini yaratish butun dunyo foydalanuvchilarining xavfsizligini zaiflashtirishini ogohlantirmoqda. Hozirga qadar Apple va Buyuk Britaniya Ichki ishlar vazirligi mazkur holatga izoh bermagan.