Galaxy S26 Ultra apelsin rangida yangi versiya chiqadi
Galaxy S26 Ultra smartfonining yangi, yorqin rangdagi versiyasi haqida ma’lumotlar paydo bo‘ldi. Bu haqda Zamin.uz xabar berdi.
Reddit tarmog‘ida Direct-Till-2680 foydalanuvchisi tomonidan e’lon qilingan suratlarda flagman modelining dastlabki maketlari ko‘rsatildi. Ushbu maketlarning biri apelsin rangida bo‘lib, foydalanuvchilar tomonidan “yangi nafas” sifatida baholandi.
Ba’zilari esa bu rangni Apple kompaniyasining iPhone 17 Pro modelidagi rangga o‘xshatib, Samsungni hazil bilan tanqid qilishdi. Suratlarga qaraganda, qurilmaning korpusi to‘rtburchak shaklida, burchaklari yumaloq qilib ishlab chiqilgan.
Kamera modulida to‘rtta obyektiv mavjud bo‘lib, avvalgi S24 Ultra modeli bilan taqqoslaganda katta o‘zgarishlar ko‘zga tashlanmaydi. Eng e’tiborga molik jihat — smartfonning apelsin rangidagi yorqin korpusi.
Samsung hozircha S26 Ultra dizayni va ranglari bo‘yicha rasmiy ma’lumot bermagan. Ammo odatda bunday oldindan tarqalgan suratlar haqiqiy modellar bilan mos keladi, chunki aksessuar ishlab chiqaruvchilar qurilmaning o‘lchamlarini oldindan bilib olishadi.
An’anaga ko‘ra, Samsung o‘z flagmanlarini qora, kumush yoki ko‘k kabi jiddiy ranglarda taqdim etadi. Shu sababli apelsin rangidagi korpus kompaniyaning dizayn yondashuvida yangilik bo‘lishi mumkin.
