O‘zbekistonda Amazon Kuiper bilan tezkor internet loyihasi boshlanadi
Raqamli texnologiyalar vaziri Sherzod Shermatov AQSHning Amazon Kuiper kompaniyasi vakillari bilan uchrashib, raqamli infratuzilmani rivojlantirish va tezkor internet xizmatlarini takomillashtirish bo‘yicha hamkorlik masalalarini muhokama qildi. Bu haqda Zamin.uz xabar berdi.
Suhbat yakunida Vazirlik va Amazon Kuiper Commercial Services LLC o‘rtasida o‘zaro tushunuv memorandumi imzolandi. Memorandumga muvofiq, mamlakat hududida Project Kuiper sun’iy yo‘ldosh tarmog‘i orqali yuqori tezlikdagi internetni ishga tushirish va telekommunikatsiya tarmoqlarini rivojlantirish yo‘nalishlari belgilandi.
Bu loyihaning maqsadi chekka hududlar, maktablar, shifoxonalar hamda tadbirkorlik subyektlari uchun internetga kirishni kengaytirishdir. Amazon Kuiper — Amazon kompaniyasining sun’iy yo‘ldosh internet xizmatlarini taqdim etuvchi bo‘limi hisoblanadi.
U past orbitada joylashgan sun’iy yo‘ldoshlar orqali butun dunyo bo‘ylab yuqori tezlikda va kechikishi kam bo‘lgan aloqa xizmatlarini taqdim etishni maqsad qiladi. Ushbu texnologiya katta hajmdagi ma’lumotlarni tez va samarali uzatish, videokonferensiyalar, masofaviy ta’lim, telemeditsina va boshqa raqamli xizmatlar sifatini oshirishga xizmat qiladi.
Memorandum doirasida tomonlar texnik yechimlarni joriy etish, tarmoq barqarorligini ta’minlash va xizmatlarni keng qamrovda yetkazish bo‘yicha hamkorlikni davom ettiradi. Mazkur loyiha mamlakatda raqamli xizmatlar sifatini oshirish, iqtisodiyotning turli sohalarida samaradorlikni kuchaytirishga imkon yaratadi.
Bu esa O‘zbekistonning raqamli infratuzilmasini yanada rivojlantirishga xizmat qiladi.
