Leonidas AR dronlarga qarshi yangi avtonom tizim yaratdi
Amerikaning Epirus va General Dynamics Land Systems kompaniyalari zamonaviy urushlarda tobora ortib borayotgan dron tahdidlariga qarshi kurashda yangi avtonom robot tizimini yaratdi. Bu haqda Zamin.uz xabar berdi.
Ushbu tizim mikrotolqinli qurol va sun’iy intellektni birlashtirgan bo‘lib, dronlarga qarshi samarali himoya vositasi hisoblanadi. Leonidas Autonomous Robotic deb nomlangan platforma Epirus kompaniyasining yuqori quvvatli mikrotolqinli qurolini General Dynamics Land Systems tomonidan ishlab chiqilgan 10 tonnalik Tracked Robot shassisiga o‘rnatadi.
Natijada, har qanday dronlar to‘dasini bir zarbada yo‘q qilishga qodir mobil va to‘liq avtonom tizim paydo bo‘ldi. Leonidas tizimi kuchli mikrotolqinli impulslar yordamida dushman dronlarining elektronikasini ishdan chiqaradi.
Bu jarayon raketa yoki artilleriya vositalarisiz, faqat elektromagnit kuch orqali amalga oshiriladi. Tizim “bir impuls – ko‘p nishon” tamoyili asosida ishlaydi va bir vaqtning o‘zida bir nechta dronlarni faoliyatsiz holga keltira oladi.
Operator tizim chastotasi va quvvatini turli sharoitlarga moslashtira oladi. Shuningdek, xavfsiz hudud funksiyasi yordamida o‘z dronlariga zarar yetkazilmasligi kafolatlanadi.
Tizimni yangilash uchun maydonni tark etish shart emas, barcha o‘zgartirishlar masofadan amalga oshiriladi. GDLS tomonidan ishlab chiqilgan TRX robot bazasida qurilgan ushbu platforma 10 tonnalik gibrid-elektr transport vositasi bo‘lib, sun’iy intellekt va kuchli sensorlar bilan jihozlangan.
U bir marta quvvatlanishda 480 kilometr masofani bosib o‘ta oladi va soatiga 72 kilometr tezlikka ega. Radar va hisoblash tizimlari tufayli Leonidas AR ham avtonom, ham masofadan boshqariladigan rejimda ishlay oladi.
Mutaxassislarning fikricha, Leonidas AR zamonaviy harbiy texnologiyalar sohasida yangi bosqich bo‘lib, u nafaqat dron tahdidlariga qarshi samarali vosita, balki kelajakda butun armiyalar uchun avtomatlashtirilgan mudofaa tizimiga aylanishi mumkin.
