Sun’iy intellekt uchun kadrlar tayyorlash boshlandi
Yig‘ilishda davlat rahbari sun’iy intellekt sohasida kadrlar tayyorlash muhimligi haqida to‘xtaldi. Bu haqda Zamin.uz xabar berdi.
U ta’kidlaganidek, ushbu sohadagi muvaffaqiyatlar nafaqat zamonaviy infratuzilma va ilg‘or algoritmlarga, balki chuqur bilim va malakaga ega mutaxassislarga ham bog‘liqdir. Sun’iy intellektning asosi matematika va informatika bo‘lib, kadrlar tayyorlash maktab bosqichidan boshlanishi lozim.
Kelgusi o‘quv yilidan boshlab informatika fanining dasturlariga sun’iy intellektga oid yangi mavzular kiritiladi. Bu maqsadda Massachusets texnologiyalar instituti bilan hamkorlikda maxsus darsliklar ishlab chiqiladi.
“Yangi O‘zbekiston” universitetida joriy yilda 100 nafar, keyingi yilda esa 1300 nafar sun’iy intellekt bo‘yicha trener-o‘qituvchilar tayyorlanadi. Ushbu mutaxassislar maktab va oliy ta’lim muassasalaridagi informatika o‘qituvchilariga zamonaviy bilimlarni yetkazadi.
Har yili eng faol va natijador 100 nafar informatika o‘qituvchisi tanlab olinib, sun’iy intellekt rivojlangan davlatlarda malaka oshirish imkoniyatiga ega bo‘ladi. Shuningdek, “Bir million o‘zbek dasturchisi” dasturining mantiqiy davomchisi sifatida “Bir million sun’iy intellekt yetakchisi” loyihasi yo‘lga qo‘yildi.
Bu loyiha doirasida joriy yilda 100 ming, kelasi yilda esa kamida 500 ming yoshlar sun’iy intellekt asoslarini o‘rganadi. Prezidentning ta’kidlashicha, loyiha maktab o‘quvchilarini ham qamrab oladi.
Har yili sun’iy intellekt bo‘yicha milliy tanlov o‘tkazilib, eng yuqori natija ko‘rsatgan yoshlar, ularning ustozlari va ta’lim muassasalari munosib rag‘batlantiriladi. Tanlov g‘oliblariga 500 nafar yoshga noutbuk, 100 nafar o‘qituvchiga ming dollarlik mukofot, ikki ta ta’lim muassasasiga esa elektromobil topshiriladi.
Davlat rahbari Shavkat Mirziyoyevning so‘zlariga ko‘ra, sun’iy intellekt texnologiyalari kelajak rivojining asosiy kuchi bo‘lib, bu jarayonga erta qo‘shilgan xalq yutuqqa erishadi.
