O‘zbekistonda seysmik xavfsizlikni mustahkamlash farmoni
O‘zbekiston Respublikasi Prezidenti tomonidan seysmik xavfsizlikni mustahkamlash va seysmologiya sohasidagi ishlarni samarali tashkil etish bo‘yicha qo‘shimcha chora-tadbirlar to‘g‘risida farmon imzolandi. Bu haqda Zamin.uz xabar berdi.
Ushbu hujjat mamlakatda zilzila xavfini oldindan aniqlash, xavfsiz infratuzilmani yaratish hamda sun’iy intellekt texnologiyalarini amaliyotga joriy etishni nazarda tutadi. Farmon doirasida madaniy meros obyektlari va yo‘l-transport inshootlarining zilzilaga chidamliligini doimiy monitoring qilish tizimi tashkil etiladi.
Shu bilan birga, seysmik xavfsizlik sohasini raqamlashtirish, ma’lumotlarni sun’iy intellekt yordamida tahlil qilish hamda qurilish maydonlarida tuproq mustahkamligini baholash kabi muhim vazifalar belgilandi. 2026-yil 1-yanvardan boshlab “A-373” va “M-39” avtomobil yo‘llari hamda ularga tutash tog‘li hududlardagi temir yo‘llar orqali radiolokatsion kosmik monitoring tizimi ishga tushiriladi.
Ushbu tizim ko‘chki va boshqa tabiiy ofatlar xavfini doimiy nazorat qiladi. Shuningdek, seysmik faol hududlarda sun’iy intellekt yordamida kuchli zilzilalarni o‘rta va uzoq muddatli prognoz qilish tizimi yo‘lga qo‘yiladi.
Dastlabki bosqichda bu tizim Toshkent shahrida tajriba tariqasida joriy etiladi. 2026-yil 1-martdan esa bino va inshootlarning zilzilabardoshligi sun’iy intellekt tahlili orqali baholanadi.
Farmonning asosiy maqsadi tabiiy ofatlar oqibatlarini oldindan aniqlash va fuqarolarning xavfsizligini ta’minlash darajasini yangi bosqichga ko‘tarishdan iboratdir. Bu chora-tadbirlar mamlakatimizda seysmik xavfsizlikni yanada mustahkamlashga xizmat qiladi.
