O‘zbekistonda yo‘ldosh aloqa tizimi kengaytiriladi
O‘zbekistonda raqamli infratuzilmani rivojlantirish va aloqa qamrovini kengaytirish bo‘yicha yangi bosqich boshlandi. Bu haqda Zamin.uz xabar berdi.
Prezidentning 2025-yil 21-oktyabrda qabul qilingan “Respublikaning olis hududlarida aloqa qamrovini oshirishda yo‘ldosh aloqa texnologiyalarini joriy etish chora-tadbirlari to‘g‘risida”gi qarori mamlakatda zamonaviy yo‘ldosh texnologiyalarini keng joriy etishga yo‘naltirilgan. Ushbu qarorning asosiy maqsadi – yer usti tarmoqlari yetib bormagan, aholi zichligi past bo‘lgan hududlarda ham barqaror va sifatli aloqa xizmatlarini ta’minlashdir.
Qarorda yo‘ldosh aloqa tizimlarini rivojlantirishning ustuvor yo‘nalishlari aniq belgilangan. Xususan, o‘rta va past orbitali yo‘ldosh tizimlarini joriy etish uchun normativ-huquqiy asoslar yaratish rejalashtirilmoqda.
Bu esa yo‘ldosh internet xizmatlarini litsenziya asosida amalga oshirish imkonini beradi. Shuningdek, 2026-yil 1-yanvardan boshlab besh yil muddatga yo‘ldosh aloqa tarmoqlarini tashkil etishda bir qator imtiyozlar beriladi.
Import qilinadigan qurilmalar, dasturiy mahsulotlar va ehtiyot qismlar bojxona to‘lovlaridan ozod qilinadi. Yo‘ldosh orqali ko‘rsatiladigan telekommunikatsiya xizmatlari qo‘shilgan qiymat solig‘idan, operatorlarning bu xizmatlari esa foyda solig‘idan ozod qilinadi.
Ekspertlar ta’kidicha, mazkur qaror nafaqat aloqa infratuzilmasini yaxshilash, balki ta’lim, tibbiyot, logistika va xavfsizlik sohalarida ham katta imkoniyatlar yaratadi. Olis hududlardagi maktab va shifoxonalarda onlayn xizmatlarni joriy etish, tezkor ma’lumot almashinuvi hamda iqtisodiy faollikni oshirishda yo‘ldosh internet muhim rol o‘ynaydi.
Qarorda, shuningdek, yo‘ldosh aloqa tarmoqlarini tashkil etishda xalqaro tajriba va yetakchi kompaniyalar bilan hamkorlik qilish, texnologiyalarni transfer qilish hamda mahalliy mutaxassislarni tayyorlash masalalari ham belgilangan. O‘zbekistonda raqamli iqtisodiyotni rivojlantirish strategiyasi doirasida yo‘ldosh texnologiyalari yaqin yillarda aholining barcha qatlamlariga yuqori tezlikdagi internet xizmatlarini yetkazishda asosiy vositalardan biriga aylanishi kutilmoqda.
Bu esa mamlakatning raqamli taraqqiyotiga katta hissa qo‘shadi.
