Sun’iy intellekt past sifatli kontentdan zarar ko‘radi

Olimlar yangi tadqiqot natijalariga ko‘ra, sun’iy intellekt past sifatli kontent bilan ta’minlanganda uning fikrlash va axloqiy qobiliyatlari sezilarli darajada pasayishini aniqlashdi. Bu haqda Zamin.uz xabar berdi.

Ushbu ma’lumot Wired nashri tomonidan e’lon qilindi. Texas universiteti, Texas A&M hamda Perdyu universiteti mutaxassislari ikki xil neyron tarmoqni o‘rgatib, ularning natijalarini taqqoslashdi.

Birinchi model ijtimoiy tarmoqlardagi ommabop qisqa videolar, breynrotlar va shov-shuvli kontent asosida o‘qitildi. Tahlil ko‘rsatdiki, bunday past sifatli ma’lumot bilan o‘qitilgan sun’iy intellektning kognitiv qobiliyati kamaydi, mulohaza yuritish darajasi yomonlashdi va axloqiy yondashuvi zaiflashdi.

Hatto unga psixopat xususiyatlar ham xos bo‘lib qoldi. Mutaxassislar bu holatni keyinchalik qayta o‘qitish orqali to‘liq bartaraf etish qiyinligini ta’kidlashmoqda.

Singapur Milliy universiteti dotsenti Junyuan Xongning fikricha, sun’iy intellektda “miyaning chirishi” boshlangach, keyingi sof ta’lim uni to‘liq tiklay olmaydi. Shuning uchun sifatli va ishonchli ma’lumotlar bilan ishlash sun’iy intellekt rivojida muhim ahamiyatga ega hisoblanadi.