Ilon Mask millionlab robot armiyasini yaratadi
Mashhur tadbirkor va Tesla kompaniyasi rahbari Ilon Mask millionlab robotlardan iborat armiyani yaratishni rejalashtirmoqda. Bu haqda Zamin.uz xabar berdi.
Wired nashri xabariga ko‘ra, u bu loyihani amalga oshirish uchun kompaniya ustidan yanada kuchliroq nazorat o‘rnatish zarurligini ta’kidlagan. Mask investorlar bilan bo‘lgan suhbatida shunday degan: “Faraz qiling, men ulkan robotlar armiyasini tuzdim.
Bunday holatda kimdir meni chetga surib qo‘yishi mumkinmi? Agar biz bu armiyani yaratadigan bo‘lsak, hech bo‘lmaganda unga kuchli ta’sir o‘tkaza olamanmi?
Gap faqat nazorat haqida emas, aynan ta’sir haqida ketmoqda. Agar men ta’sirga ega bo‘lmasam, bu loyiha men uchun xavfli bo‘ladi.” Milliarder fikricha, Tesla tomonidan ishlab chiqilayotgan Optimus nomli robotlar turli sohalarda — zavodlarda ishlab, bolalarga g‘amxo‘rlik qilishda ham foydali bo‘lishi mumkin.
Unga ko‘ra, Optimus juda ajoyib jarroh bo‘lishi mumkin. “Tasavvur qiling, har bir inson bunday mukammal jarroh xizmatidan foydalanish imkoniga ega bo‘lsa,” deydi Mask.
Shuningdek, uning fikricha, Tesla robotlari yordamida qashshoqlik yo‘qolgan, har bir inson eng yuqori darajadagi tibbiy yordamdan foydalanadigan yangi dunyo yaratiladi. Ma’lum qilinishicha, kelgusi yilning fevral yoki mart oylariga qadar Optimus robotining to‘liq ishlab chiqishga tayyor prototipi tayyor bo‘ladi.
Robotlarni ommaviy ishlab chiqarish esa 2026 yil oxirida boshlanishi rejalashtirilgan. Dastlabki bosqichda 5 mingtagacha odamga o‘xshash robot yetkazib berilishi kutilmoqda.
