Buyuk Britaniyaning raqobat bo‘yicha apellyatsiya sudi Apple kompaniyasiga qarshi jamoaviy da’vo bo‘yicha 1,5 milliard funt sterling miqdorida qaror chiqardi. Bu haqda Zamin.uz xabar berdi.
Sud da’vogarlarning talablarini qo‘llab-quvvatladi. Mamlakatda taxminan 20 million foydalanuvchi nomidan ushbu jamoaviy da’vo arizasi topshirilganligi ma’lum qilindi.
Da’vo Apple kompaniyasining App Store ilovalar do‘konidagi siyosatiga nisbatan norozilik asosida berilgan. Kompaniya o‘zining bozor ustunligini suiiste’mol qilib, ishlab chiquvchilardan adolatsiz deb hisoblangan 30 foizlik komissiya olgani ayblanmoqda.
Sud qaroriga ko‘ra, 2015 yil oktyabridan 2020 yil oxirigacha Apple ilovalar bozorida raqobatga to‘sqinlik qilgan va ishlab chiquvchilardan ortiqcha miqdorda komissiya undirgan. Sudya da’vogarlar kompensatsiya olish huquqiga ega ekanini ta’kidladi.
Apple kompaniyasiga nisbatan jarima miqdori va boshqa choralarga oid yakuniy qaror 2025 yil noyabr oyida o‘tkaziladigan sud eshituvlarida belgilanadi. Ushbu ish raqobat qonunchiligi doirasida muhim ahamiyatga ega hisoblanadi.
