Samsung yangi Galaxy S26 smartfonlarini taqdim etdi

2026-yil 25-fevral kuni Samsung kompaniyasi Galaxy Unpacked tadbirida o'zining yangi flagman smartfonlari — Galaxy S26, S26+ va S26 Ultra modellarini taqdim etdi. Bu haqda Zamin.uz xabar berdi.

Ushbu qurilmalarda asosiy e'tibor sun'iy intellekt imkoniyatlari va yangi avlod kuchli protsessorlariga qaratilgan. Galaxy S26 Ultra modelining asosiy xususiyatlari quyidagicha: 6.9 dyuymli Dynamic AMOLED 2X ekranga ega.

Smartfon Snapdragon 8 Elite Gen 5 (3 nm) protsessori bilan jihozlangan. Xotira hajmi 12 yoki 16 GB RAM va ichki xotira 256 GB dan 1 TB gacha o'zgaradi.

Qurilma 5000 mAh sig‘imli batareyaga ega bo‘lib, 60 vatt tezkor quvvatlash imkoniyatini beradi. 30 daqiqada 75 foizgacha quvvatlanadi.

Asosiy kamera 200 megapikselli bo‘lib, 5 marta periskopli yaqinlashtirish va 8K formatda video yozish imkoniyatiga ega. Shuningdek, yangi Privacy Display texnologiyasi va 7 yillik dasturiy ta'minot yangilanish kafolati bilan ham ajralib turadi.

Galaxy S26 va S26+ modellarida 6.3 dyuym (S26) va 6.7 dyuym (S26+) AMOLED displeylar mavjud. Ular 12 GB RAM va 256 GB dan boshlanuvchi ichki xotira bilan ta'minlangan.

Samsung 128 GB versiyasidan butunlay voz kechgan. S26 modelida 4300 mAh, S26+ modelida esa 4900 mAh sig‘imli batareya mavjud.

Asosiy kamera esa 50 megapikselli. Yangi qurilmalar uchun boshlang‘ich narxlar quyidagicha belgilangan: Galaxy S26 modeli uchun $899.99, Galaxy S26+ modeli uchun esa $1,099.99.

Ushbu smartfonlar 11-martdan boshlab rasman sotuvga chiqariladi.