O‘zbekistonda dronlardan foydalanish tartibi soddalashtiriladi
2026 yildan boshlab O‘zbekistonda korxonalar uchun dronlardan foydalanish tartibi sezilarli darajada osonlashtirilishi kutilmoqda. Bu haqda Zamin.uz xabar berdi.
Prezident farmoni asosida qabul qilingan davlat dasturi doirasida fuqaro aviatsiyasida uchuvchisiz uchish vositalaridan foydalanish qoidalari liberallashtiriladi. Bu o‘zgarishlar natijasida yuridik shaxslarga dronlarni import qilish, ishlab chiqarish va ulardan foydalanish huquqi beriladi.
Shu bilan birga, dronlar, ularning ehtiyot qismlari, sotuv va texnik xizmat ko‘rsatish tizimi ham tartibga solinadi. Bu jarayonlar litsenziya va sertifikatlar asosida amalga oshiriladi, ya’ni har bir qadam qoidalar asosida bo‘ladi.
Xavfsizlik masalalari ham e’tibordan chetda qolmaydi. Mamlakat havo hududi “yashil”, “sariq” va “qizil” zonalarga bo‘linib, har bir hududda qayerda va qanday sharoitda uchish mumkinligi aniq belgilab beriladi.
Parvozlarni kuzatish va nazorat qilish uchun yagona avtomatlashtirilgan raqamli infratuzilma joriy etiladi. Shu bilan birga, dron operatorlari uchun maxsus o‘qitish dasturlari va guvohnoma hamda litsenziya berish tizimi yo‘lga qo‘yiladi.
Bu borada Mudofaa, Transport va Raqamli texnologiyalar vazirliklari hamda Strategik rivojlanish va islohotlar agentligiga 2026 yil iyunigacha tegishli hujjat loyihasini ishlab chiqish vazifasi yuklatilgan.
