Ovozli robot ruscha haqoratlarni tez o‘rgandi
Kommunal xizmatlar boshqaruv kompaniyalari uchun yaratilgan ovozli robot dastlabki bir oy ichida mijozlar bilan muloqotda ishlatiladigan ruscha haqoratli so‘zlarni o‘rganib oldi. Bu haqda Zamin.uz xabar berdi.
Ushbu holat uning ishlab chiquvchilarini xatoni tuzatishga majbur qildi. Bu haqda Axborot modellashtirish texnologiyalari tashkilotlari milliy birlashmasi (NOTIM) prezidenti Mixail Viktorov Sibir qurilish forumida ma’lum qildi.
Viktorovning ta’kidlashicha, neyrotarmoq o‘rganish qobiliyatiga ega bo‘lib, dastlabki oydayoq haqoratli so‘zlarni o‘zlashtirdi. U "Kim bilan yursang, shunday bo‘lasan" maqolini keltirib, bu holatni izohladi.
NOTIM rahbari bu holatni fuqarolar bilan samarali muloqot qilish uchun muhim ko‘rsatkich sifatida baholadi. Ovozli yordamchi mijozlarning 80 foiz savollarini hal qilishi mumkin, lekin ba’zi favqulodda vaziyatlarda odamlarning g‘azablanishi va operator yordami zarur bo‘lishi mumkin.
Shuningdek, 30 yanvar kuni sun’iy intellektning oddiy emojilarni tanimayotgani haqida xabar berildi. Xitoylik olimlar neyrotarmoq emojilarni tizimdagi nosozlikka olib keladigan ortiqcha va noaniq signal sifatida qabul qilishini aniqlashdi.
