Xitoyda Starlink tizimiga tahdid soluvchi qurilma yaratildi
Xitoylik olimlar past orbitadagi sun’iy yo‘ldoshlar, jumladan, Starlink tizimiga ta’sir qilishi mumkin bo‘lgan yangi mikroto‘lqinli qurilmani taqdim etdi. Bu haqda Zamin.uz xabar berdi.
Bu haqda South China Morning Post xabar berdi va ijtimoiy tarmoqlarda ham keng muhokama qilinmoqda. Qurilma Sian shahridagi Shimoli-g‘arbiy yadro texnologiyalari institutida ishlab chiqilgan bo‘lib, TPG1000Cs deb nomlanadi.
Ayrim mutaxassislar uni "Starlink qotili" deb atashmoqda. Qurilma yuqori quvvatli mikroto‘lqin texnologiyasiga asoslanadi va 60 soniya davomida 20 GVtgacha bo‘lgan impulslar chiqara oladi.
Bu past orbitadagi aloqa va kuzatuv yo‘ldoshlari ishida jiddiy uzilishlar keltirib chiqarishi mumkin. Mutaxassislar fikricha, past orbitadagi Starlink yo‘ldoshlari faoliyatini buzish uchun 1 GVt quvvat yetarli bo‘lishi mumkin, yangi qurilma esa bundan bir necha karra kuchliroq.
Qurilmaning uzunligi taxminan 4 metr, og‘irligi esa 5 tonna atrofida bo‘lib, uni turli transport vositalariga joylashtirish mumkin. Bunga qadar mavjud bo‘lgan shunga o‘xshash mikroto‘lqin tizimlari odatda uzluksiz 3 soniyadan ortiq ishlay olmagan va ancha yirik bo‘lgan.
TPG1000Cs esa bir seansda bir necha mingta yuqori energiyali impuls chiqarishga qodir va uzoq davom etgan sinovlarda barqarorligini ko‘rsatgan. Umuman olganda, bu yangilik kosmosdagi infratuzilmani kuchaytirishga qaratilgan texnologiyalar rivojlanib borayotganidan darak beradi.
Fan taraqqiyoti davom etayotgan bo‘lsa-da, bu texnologiyalar kiberpank uslubidagi voqealarga o‘xshab ketadi.
