Smartfonlar bahorda 10-30 foizga qimmatlashishi mumkin
Bahor fasli yaqinlashar ekan, nafaqat ob-havo, balki texnologik qurilmalar, xususan, smartfonlar ham qimmatlashishi mumkin. Bu haqda Zamin.uz xabar berdi.
Axborot texnologiyalari bo‘yicha ekspert Eldar Murtazin smartfonlar bahor oylariga kelib o‘rtacha 10-30 foizgacha qimmatlashishi ehtimolini bildirmoqda. Ushbu prognozning asosiy sababi sifatida bozordagi xotira chiplari narxining oshishi ko‘rsatilmoqda.
Oldinroq tahlilchilar smartfonlarda ishlatiladigan xotira elementlari jahon miqyosida qimmatlayotganini ta’kidlagan edi. Masalan, Counterpoint Research tahliliy kompaniyasi ma’lumotlariga ko‘ra, yilning birinchi choragida xotira narxi 40-50 foizgacha ko‘tarilishi kutilmoqda, ikkinchi chorakda esa yana taxminan 20 foizga oshishi mumkin.
Murtazin narxlar hozirning o‘zida sezilarli darajada o‘zgarayotganini aytadi. Mart-aprel oylariga kelib, bu jarayon yanada kuchayishi va narx o‘sishi texnika turiga qarab farqlanishi mumkin.
Uning so‘zlariga ko‘ra, smartfonlar 10-30 foizgacha, noutbuklar o‘rtacha 20 foizgacha, o‘yin noutbuklari esa 30-40 foizgacha qimmatlashishi mumkin. Ushbu jarayon faqat smartfon va kompyuterlar bilan cheklanib qolmay, boshqa turdagi texnika, jumladan, maishiy texnika ham qimmatlashishi mumkin.
Shunday ekan, kim yaqin oylarda telefon yoki noutbuk sotib olishni rejalashtirgan bo‘lsa, bahorga qoldirish ularni qimmat xarajatga olib kelishi mumkin.
