Xitoy maktablarida sun'iy intellekt joriy etilmoqda

Xitoy Tashqi ishlar vazirligi vakili Mao Nin o'zining ijtimoiy tarmoqdagi sahifasida Xitoy maktablarida sun'iy intellekt texnologiyalarining joriy etilayotganini ko'rsatuvchi videoni e'lon qildi. Bu haqda Zamin.uz xabar berdi.

Ushbu texnologiyalar o'quvchilarning bilimlarini baholash jarayonini avtomatlashtirishga yordam bermoqda. Bu esa o'quvchilarga o'z ishlari bo'yicha tez va aniq natijalar olish imkonini beradi, o'qituvchilarga esa qo'shimcha yukdan qutulish imkoniyatini taqdim etadi.

Jarayon yozma topshiriqlarni skanerlash va ularni aqlli tizim orqali zudlik bilan tahlil qilishni o'z ichiga oladi. Sun'iy intellekt texnologiyalari o'qituvchining ishtirokisiz ham o'quvchining qo'lda yozilgan javoblariga asoslangan holda tezkor mulohaza va to'g'ri baho bera oladi.

Ushbu video ijtimoiy tarmoqlarda, xususan X va Xitoyning mashhur Weibo platformasida keng tarqalib, foydalanuvchilarning katta qiziqishini uyg'otdi. Bu yangilik Xitoy ta'lim tizimida zamonaviy texnologiyalarning qanday joriy etilayotganini ko'rsatadi.