Alibaba suniy aql yetakchisi Junyang Lin lavozimidan ketdi
Xitoyning texnologiya sohasidagi yirik kompaniyalaridan biri bo‘lgan Alibaba’da kutilmagan kadrlar o‘zgarishi yuz berdi. Bu haqda Zamin.uz xabar berdi.
Kompaniyaning sun’iy aql bo‘yicha muhim loyihalaridan biri hisoblangan Qwen modellarini yaratishda yetakchi mutaxassislardan biri, Junyang Lin o‘z lavozimidan ketdi. Bu yangilik Qwen 3.5 nomli yangi kichik modellar taqdim etilganidan so‘ng e’lon qilindi.
Junyang Lin 2019-yildan beri Alibaba jamoasida faoliyat yuritib kelayotgandi va 2023-yil aprel oyidan boshlab aynan Qwen bo‘limiga rahbarlik qilayotgan edi. Uning ketishi kompaniya ichida va soha mutaxassislari orasida katta muhokamalarga sabab bo‘ldi.
Loyihaning boshqa ishtirokchilaridan biri, Chen Cheng, ijtimoiy tarmoqlarda bu yangilik unga juda og‘ir bo‘lganini bildirgan hamda Junyang Linning ketishi uning shaxsiy qarori bo‘lmasligi mumkinligini ta’kidlagan. Alibaba’ning Qwen modellari hozirgi kunda sun’iy aql sohasida istiqbolli loyihalardan biri sifatida e’tirof etilmoqda.
Hatto Ilon Mask ham ushbu modellar yuqori samaradorlikka ega ekanini va ularning aql zichligi alohida ahamiyatga ega ekanini ta’kidlagan. Kompaniya OpenAI, Google va Anthropic kabi xalqaro raqobatchilar bilan raqobat olib borayotgan paytda yuzaga kelgan bu o‘zgarish ko‘plab savollarni keltirib chiqardi.
Hozircha Alibaba rahbariyati va Junyang Lin o‘zi bu masala yuzasidan rasmiy bayonot bermadi.
