O‘zbekiston olimlari ekologik tozalash uchun yangi material yaratdi
O‘zbekiston Fanlar akademiyasi olimlari havoni va suvni samarali tozalashga mo‘ljallangan yangi avlod materialni yaratdi. Bu haqda Zamin.uz xabar berdi.
Tadqiqotchilar nanosellyuloza asosida tayyorlangan gibrid aerogelni ixtiro qildilar. Bu material ekologik jihatdan xavfsiz bo‘lib, tabiiy muhitga zarar yetkazmaydi.
Yangi materialning g‘ovakli tuzilishi zaharli moddalarni tezda o‘ziga singdiradi. Shu sababli havodagi zararli gazlar va suvdagi og‘ir metallarni samarali ushlab qoladi.
Bu xususiyatlari bilan u ekologik filtrlash tizimlarida hamda sanoat sohasida keng qo‘llanishi mumkin. Fanlar akademiyasining rasmiy xabarida aytilishicha, ushbu ixtiro nafaqat havodagi toksik gazlarni filtrlashda, balki suvni og‘ir metallaridan tozalashda ham juda samarali.
Bundan tashqari, bu material qurilish sohasida ham keng qo‘llaniladi. Uylarni issiq va sovuqdan izolyatsiya qiladi, shovqinni kamaytiradi hamda engil bo‘lishiga qaramay mustahkamlikni saqlaydi.
Olimlar ta’kidlaganidek, ushbu innovatsiya ekologik texnologiyalarni rivojlantirishda yangi bosqichni boshlab beradi. Shu bilan birga sanoat va uy-joy qurilishida keng qo‘llanilishi mumkin bo‘lgan samarali yechim hisoblanadi.
Bu ixtiro atrof-muhitni muhofaza qilish va resurslarni tejash borasida muhim ahamiyatga ega.
