Yaponiyada suniy aql asosida chaqaloq yig‘lashini aniqlovchi ilova yaratildi
Yaponiyada sun’iy aql asosida ishlovchi Awababy nomli ilova yaratildi. Bu haqda Zamin.uz xabar berdi.
Ushbu ilova ota-onalarga chaqaloqning nima uchun yig‘layotganini aniqlashda yordam beradi. Ma’lum qilinishicha, ilova taxminan 150 mingdan ortiq audio yozuvlar asosida o‘qitilgan.
Algoritm chaqaloqning yig‘lash tovushining balandligi, ohangi va davomiyligini tahlil qilib, yig‘lash sababini aniqlaydi. Ilova 11 xil holat va ehtiyojni farqlay oladi.
Ularga ochlik, uyquchanlik, noqulaylik, yolg‘izlik, tana haroratining o‘zgarishi, qorin og‘rig‘i va e’tiborga muhtojlik kabi holatlar kiradi. Bundan tashqari, foydalanuvchilar turli vaziyatlarda bolani qanday tinchlantirganliklari haqida o‘z tajribalari bilan bo‘lishish imkoniga ega.
Bu esa umumiy tavsiyalar bazasini yaratishda yordam beradi. Ma’lum bo‘lishicha, 20 apreldan boshlab Yaponiyaning Misima shahrida ikki yoshgacha bolasi bor oilalar uchun ilovaning premium versiyasi bepul taqdim etiladi.
Awababy ilovasi ota-onalarga chaqaloqning ehtiyojlarini yaxshiroq tushunish va unga to‘g‘ri munosabatda bo‘lish imkonini beradi. Bu esa bolani tezroq tinchlantirishga va ota-onalarning hayotini yengillashtirishga xizmat qiladi.
Ilovaning bunday imkoniyatlari ota-onalar orasida katta qiziqish uyg‘otmoqda.
