Sem Altman suniy intellektning vaqtni belgilashdagi xatolarini tan oldi
OpenAI kompaniyasi rahbari Sem Altman suniy intellekt texnologiyalari hozirgi vaqtda aniq vaqtni o‘lchash va uni kuzatib borish borasida jiddiy qiyinchiliklarga duch kelayotganini ochiq tan oldi. Bu haqda Zamin.uz xabar berdi.
U kelgusi bir yil ichida ushbu kamchilikni bartaraf etish va tizim imkoniyatlarini yanada takomillashtirishga va’da berdi. Mazkur muammo ijtimoiy tarmoqlarda tarqalgan videolavhalardan so‘ng keng muhokamalarga sabab bo‘ldi.
Videoda suniy intellektning ovozli rejimi foydalanuvchiga real vaqtni ko‘rsatish o‘rniga, mutlaqo uydirma ma’lumotlarni taqdim etgani aks etgan. Mostly Human ko‘rsatuvi davomida berilgan savollarga javob berar ekan, Sem Altman bu holat tizim uchun haqiqatan ham murakkab vazifa ekanligini tasdiqladi.
Uning tushuntirishicha, hozirgi ovozli modellar taymerlarni ishga tushirish yoki voqealar davomiyligini real vaqt rejimida nazorat qilish funksiyasiga ega emas. Biroq kompaniya mutaxassislari yaqin kelajakda amalga oshiriladigan yangilanishlar orqali ushbu funksiyalarni tizimga to‘liq integratsiya qilish ustida ishlamoqda.
Suniy intellekt modellari vaqt tushunchalari bilan ishlashda tez-tez xatoliklarga yo‘l qo‘yadi. Ular ko‘pincha matnli suhbatlarda vaqt oralig‘ini noto‘g‘ri baholaydi yoki tasvirlardagi soatlarni tahlil qilishda qiynaladi.
Qizig‘i shundaki, ushbu muammoni ko‘tarib chiqqan foydalanuvchi ChatGPT tizimidan Altmanning izohlari haqida so‘raganida, chatbot o‘z yaratuvchisining so‘zlariga zid ravishda, go‘yoki unda vaqtni kuzatish imkoniyati mavjudligini ta’kidlab o‘tgan. Bu holat suniy intellektning o‘z imkoniyatlarini baholashda ham hali ancha yo‘l bosishi kerakligini ko‘rsatadi.
Kelgusida ishlab chiquvchilar aniq matematik hisob-kitoblar va vaqtni boshqarish bo‘yicha yanada barqaror yechimlarni taqdim etishlari kutilmoqda.
