Mobil operatorlar faqat ovozli va SMS tariflarni joriy etadi
O‘zbekistonda mobil aloqa operatorlari uchun faqat ovozli qo‘ng‘iroqlar va SMS xizmatlarini o‘z ichiga olgan alohida tarif rejalarini joriy etish majburiyati kiritilishi mumkin. Bu haqda Zamin.uz xabar berdi.
Ushbu masala yuzasidan Adliya vazirligi tomonidan hukumat qarori loyihasi ishlab chiqildi. Taqdim etilgan loyihaga ko‘ra, mazkur talab telekommunikatsiya sohasidagi litsenziya shartlariga kiritilishi rejalashtirilmoqda.
Bu operatorlarning internet trafigi bilan bog‘liq tariflardan tashqari, faqat oddiy va arzon ovozli paketlarni ham foydalanuvchilar uchun taqdim etishini ta’minlaydi. Hozirgi kunda aksariyat tariflar majburiy ravishda internet xizmatlarini o‘z ichiga olgan.
Bu holat ayrim abonentlar uchun ortiqcha xarajatlarga sabab bo‘lishi va ularning tanlov imkoniyatlarini cheklashi mumkin. Faqat ovozli aloqa uchun mo‘ljallangan tariflarning mavjudligi esa foydalanuvchilarga moliyaviy tejamkorlikni ta’minlaydi va tanlov erkinligini yaratadi.
Loyiha doirasida yana bir muhim o‘zgarish taklif qilinmoqda. Unga ko‘ra, tarif nomlarida oylik to‘lov miqdoriga mos keladigan raqamlardan foydalanish taqiqlanadi.
Bunday chora abonentlarning chalg‘itilishini oldini olish va tarif nomi bilan uning haqiqiy narxi o‘rtasidagi tafovutni bartaraf etish maqsadida kiritilmoqda. Agar ushbu yangi qoidalar ishga kirsa, mobil aloqa foydalanuvchilari uchun oddiy, tushunarli va internetsiz tariflar qaytadan imkoniyatlar doirasiga kiradi.
Bu esa aloqa xizmatlarining yanada qulay va shaffof bo‘lishiga xizmat qiladi.
