AQShda sun'iy intellekt markazi qurilishi uchun suv o'g'irlandi
Amerika Qo'shma Shtatlarining Jorjiya shtatida sun'iy intellekt infratuzilmasini rivojlantirish bilan bog'liq yirik mojaro yuzaga keldi. Bu haqda Zamin.uz xabar berdi.
Blackstone investitsiya korporatsiyasiga qarashli Quality Technology Services kompaniyasi mahalliy aholi suv bosimi pasayishidan shikoyat qilayotgan bir paytda, suv quvurlariga noqonuniy ulanib, 110 million litrdan ortiq suvni sarflab yuborgani ma'lum bo'ldi. Ushbu holat texnologik gigantlarning tabiiy resurslarga bo'lgan munosabati borasidagi bahslarni yanada avj oldirdi.
Kompaniya Fayettevill loyihasi doirasida barpo etilayotgan ulkan ma'lumotlarni qayta ishlash markazi qurilishi uchun suvdan ruxsatsiz foydalangan. Hududda kuchli qurg'oqchilik kuzatilib, mahalliy aholi suvni tejashga chaqirilgan bir vaqtda, kompaniya qurilish ehtiyojlari, xususan, beton qorish va changni bostirish uchun kommunal tarmoqlardan nazoratsiz ravishda suv olgan.
Mahalliy suv ta'minoti xizmati vakillari ushbu ko'ngilsiz holatni texnik xatoliklar va sohada kadrlar yetishmovchiligi mavjudligi bilan izohlashga urindi. Mazkur qonunbuzarlik natijasida kompaniya sarflangan suv uchun 147 ming dollar miqdorida to'lovni amalga oshirishi lozim edi.
Biroq okrug rasmiylari ushbu korxona hududdagi eng yirik mijoz va sarmoyador ekanligini vaj qilib, ularga nisbatan qo'shimcha jarima choralarini qo'llashdan bosh tortdi. Kompaniya rahbariyati kelajakda suvni tejaydigan yopiq sovutish tizimlaridan foydalanishga va'da berayotgan bo'lsa-da, bu voqea zamonaviy texnologiyalarning resurslarga bo'lgan haddan tashqari ehtiyoji borasida jiddiy savollarni o'rtaga tashladi.
Hozirgi kunda Jorjiya shtatida 200 dan ortiq ma'lumotlar markazi faoliyat yuritmoqda. Ularning elektr energiyasi va suv resurslariga bo'lgan ulkan talabi mahalliy aholining keskin noroziligiga sabab bo'lmoqda.
Shu bois ko'plab shaharlar ma'muriyati yangi ma'lumotlar markazlari qurilishiga vaqtincha taqiq joriy etgan. Ushbu hodisa texnologik taraqqiyot va tabiiy boyliklar taqchilligi o'rtasidagi ziddiyatning yaqqol namunasiga aylandi.
Zero, raqamli iqtisodiyotning o'sishi atrof-muhit va aholi turmush tarziga zarar yetkazmasligi lozim.
