Jeyms Webb teleskopi uchun tasvir aniqligini oshiruvchi texnologiya yaratildi

Astronomlar Jeyms Webb kosmik teleskopining tasvir aniqligini sezilarli darajada oshirishga xizmat qiluvchi yangi suniy intellekt tizimini ishlab chiqdilar. Bu haqda Zamin.uz xabar berdi.

Ushbu uslub yorqin yulduzlar yaqinida joylashgan xira osmon jismlarini kuzatishga xalaqit beradigan texnik nuqsonlarni bartaraf etishga imkon berdi. Natijada avvallari ko‘rinmas bo‘lgan kosmik tuzilmalarni yuqori sifatda suratga olish imkoniyati paydo bo‘ldi.

Bu yangilik koinot sirlarini o‘rganishda yangi davrni boshlab berishi kutilmoqda. Asosiy muammo teleskopning yaqin infraqizil nurlarni o‘rganish uskunasi tarkibidagi interferometriya tizimida yuzaga kelgan edi.

Sensorlardagi zaryad ko‘chishi hodisasi olingan ma’lumotlarni buzib, tasvir sifatini pasaytirayotgan edi. Olimlar ushbu texnik to‘siqni bartaraf etish maqsadida AMIGO deb nomlangan maxsus raqamli tizimni yaratdilar.

Ushbu algoritm teleskopning to‘liq raqamli nusxasini shakllantirib, butun optika va elektronika tizimining ish faoliyatini qayta modellashtiradi. Yangi tizim haqiqiy ma’lumotlarni sun’iy ravishda yaratilgan tasvirlar bilan taqqoslab, xatoliklarni avtomatik tarzda tuzatadi.

Undagi neyron tarmoq moduli sensorlardagi zaryad taqsimotini muvozanatlashda muhim vazifani bajaradi. Ushbu texnologiya yordamida tadqiqotchilar bir qator subyulduzli obyektlarni hamda Yupiterning yo‘ldoshi bo‘lgan Iodagi vulqon nuqtalarini aniq ko‘rishga muvaffaq bo‘lishdi.

Mazkur yutuq quyosh tizimidan tashqaridagi sayyoralarning atmosferasini o‘rganishda juda muhim hisoblanadi. Endilikda astronomlar yorqin yulduzlar soyasida qolib ketadigan mitti sayyoralarni ham bemalol kuzata oladilar.

Bu kabi texnologik yechimlar koinotni tadqiq etishda insoniyat imkoniyatlarini yanada kengaytiradi va olis galaktikalar haqidagi tasavvurlarimizni boyitadi. Mutaxassislar ushbu tizimni boshqa kosmik loyihalarda ham qo‘llashni rejalashtirmoqdalar.