TikTok Buyuk Britaniyada reklamasiz pullik obuna xizmatini joriy etdi

TikTok ijtimoiy tarmog‘i Buyuk Britaniyadagi foydalanuvchilari uchun yangi qulaylikni taqdim etdi. Bu haqda Zamin.uz xabar berdi.

Endilikda ushbu mamlakat rezidentlari oyiga 3,99 funt sterling miqdorida haq to‘lash orqali platformadan reklamasiz foydalanishlari mumkin bo‘ladi. Mazkur yangi xizmat turi yaqin oylar davomida bosqichma-bosqich joriy etilishi kutilmoqda.

Belgingangan tartibga ko‘ra, ushbu imkoniyatdan faqat o‘n sakkiz yoshga to‘lgan va undan katta bo‘lgan shaxslar foydalanish huquqiga ega. Bu haqdagi ma’lumotlar xalqaro texnologik nashrlarda e’lon qilindi.

Pullik obunani rasmiylashtirgan foydalanuvchilar ijtimoiy tarmoqdan foydalanish davomida hech qanday reklama roliklariga duch kelmaydilar. Muhimi shundaki, ularning shaxsiy ma’lumotlari reklama beruvchilar manfaati uchun yig‘ilmaydi va qayta ishlanmaydi.

Mutaxassislarning fikricha, bunday qadamning qo‘yilishi Buyuk Britaniyadagi shaxsiy ma’lumotlarni himoya qilish bo‘yicha qat’iy qonunchilik talablari bilan bog‘liqdir. Amaldagi tartibga ko‘ra, kompaniyalar foydalanuvchining ruxsatisiz uning ma’lumotlaridan tijorat maqsadlarida foydalanishi taqiqlangan.

Kompaniyaning Buyuk Britaniyadagi vakillari ushbu yangilikni sharhlar ekan, platforma o‘z hamjamiyati uchun tanlov imkoniyatlarini kengaytirayotganini qayd etishdi. Ta’kidlanishicha, reklamasiz reja foydalanuvchilarga o‘z sahifalarini yanada qulayroq boshqarish imkonini beradi.

Shu bilan birga, platformaning bepul talqinida biznes vakillari uchun reklama joylashtirish imkoniyatlari o‘zgarishsiz qoladi. Bu esa ham foydalanuvchilar, ham tadbirkorlar uchun muvozanatli muhit yaratishga xizmat qiladi.

Ma’lumot o‘rnida aytish joizki, TikTok ushbu obuna modelini o‘tgan yilning o‘rtalaridan boshlab sinovdan o‘tkazishga kirishgan edi. Hozircha ijtimoiy tarmoq ma’muriyati ushbu xizmatni Amerika Qo‘shma Shtatlari yoki boshqa mintaqalarda qachon joriy etishi borasida rasmiy bayonot bermadi.

Shunday bo‘lsa-da, mazkur tajriba muvaffaqiyatli o‘tsa, kelgusida boshqa davlatlarda ham pullik obuna tizimi yo‘lga qo‘yilishi ehtimoli yuqori.