AQSHda bank mijozlarining maxfiy ma’lumotlari kiberhujum sababli o‘g‘irlandi
Pensilvaniya, Ogayo va G‘arbiy Virjiniya shtatlarida faoliyat yurituvchi Community Bank moliya muassasasi kiberxavfsizlik bilan bog‘liq jiddiy ko‘ngilsizlik yuz berganini rasman ma’lum qildi. Bu haqda Zamin.uz xabar berdi.
Bank rahbariyati mijozlarning ism-sharifi, tug‘ilgan sanasi va ijtimoiy sug‘urta raqamlari kabi o‘ta maxfiy ma’lumotlar uchinchi shaxslar qo‘liga o‘tganini tan oldi. Ushbu voqea haqida xalqaro axborot texnologiyalari nashrlari batafsil xabar tarqatmoqda.
Amerika Qo‘shma Shtatlarining Qimmatli qog‘ozlar va birjalar komissiyasiga taqdim etilgan rasmiy hisobotga ko‘ra, ma’lumotlarning tashqariga chiqib ketishiga bank tizimida ruxsat etilmagan sun’iy intellekt dasturiy ta’minotidan foydalanilgani sabab bo‘lgan. Bank mutasaddilari ushbu holatni maxfiy ma’lumotlarning hajmi va ahamiyati yuqori bo‘lgani sababli jamoatchilikka ochiqlashga qaror qildi.
Bu kabi holatlar moliya muassasalari uchun nafaqat moddiy, balki obro‘ jihatidan ham katta xavf tug‘diradi. Garchi hodisa tafsilotlari to‘liq e’lon qilinmagan bo‘lsa-da, mutaxassislar bank xodimlaridan biri mijozlarga tegishli maxfiy ma’lumotlarni internetdagi sun’iy intellektga asoslangan muloqot botlaridan biriga yuklagan bo‘lishi mumkinligini taxmin qilmoqda.
Natijada barcha maxfiy ma’lumotlar ushbu botni ishlab chiqqan kompaniya serverlariga borib tushgan va uchinchi shaxslar uchun ochiq holatga kelib qolgan. Bu esa zamonaviy texnologiyalardan foydalanishda ehtiyotkorlik naqadar muhimligini yana bir bor isbotlamoqda.
Hozircha Community Bank ma’lumotlari o‘g‘irlangan mijozlarning aniq sonini yoki aynan qaysi sun’iy intellekt ilovasi orqali bu xatoga yo‘l qo‘yilganini ochiqlagani yo‘q. Bank rahbariyati zarar ko‘rgan mijozlar ro‘yxatini shakllantirish va ma’lumotlarning xavfsizlik darajasini baholash jarayoni davom etayotganini bildirdi.
Amaldagi qonunchilik talablariga muvofiq, ma’lumotlari xavf ostida qolgan barcha fuqarolarga tegishli ogohlantirish xabarlari yuborilmoqda. Moliya muassasasi kelgusida bunday holatlarning oldini olish uchun xavfsizlik choralarini yanada kuchaytirishini ma’lum qildi.
