Cerebras kompaniyasi aksiyalarni sotish orqali milliardlab sarmoya jalb qildi
Suniy intellekt texnologiyalari uchun maxsus mikrosxemalar ishlab chiqaruvchi Cerebras kompaniyasi aksiyalarni ommaviy joylashtirish jarayonida 5,5 milliard dollar miqdorida sarmoya jalb etishga muvaffaq bo‘ldi. Bu haqda Zamin.uz xabar berdi.
Kompaniya qimmatli qog‘ozlarining yakuniy narxi kutilganidan ancha yuqori bo‘lib, har bir aksiya uchun 185 dollar etib belgilandi. Ta’kidlash joizki, dastlabki bosqichda narxlar 115-125 dollar oralig‘ida bo‘lishi taxmin qilingan, keyinchalik esa bu ko‘rsatkich 150-160 dollargacha ko‘tarilgan edi.
Mazkur muvaffaqiyatli kelashuv natijasida Cerebras kompaniyasining bozor qiymati 56,4 milliard dollarga yetdi. Ushbu ma’lumotlar nufuzli nashrlar tomonidan tasdiqlandi.
Kompaniya asoschilari Endryu Feldman va Shon Li ushbu jarayon ortidan yirik sarmoya egalariga aylanishdi. Bir yil muqaddam Cerebras uchun bunday yuksak natijalarga erishish deyarli imkonsizdek tuyulgan edi.
Sohada yetakchi hisoblangan NVIDIA kompaniyasining asosiy raqobatchilaridan biri bo‘lgan ushbu korxona 2024-yilda aksiyalarini bozorga chiqarishga uringan edi. Biroq o‘sha paytda Abu-Dabining Group 42 kompaniyasi bilan bog‘liq tekshiruvlar hamda ayrim moliyaviy qiyinchiliklar tufayli bu rejalar vaqtincha to‘xtatib qo‘yilgan edi.
2025-yilga kelib vaziyat ijobiy tomonga tubdan o‘zgardi. Cerebras o‘zining yillik daromadini 510 million dollargacha yetkazib, 76 foizlik o‘sish ko‘rsatkichini qayd etdi.
Kompaniya avvalgi yillardagi katta miqdordagi zararlardan qutulishga muvaffaq bo‘ldi va 237,8 million dollar miqdorida sof foyda ko‘rdi. Bunday moliyaviy barqarorlik investorlarning kompaniyaga bo‘lgan ishonchini qayta tiklashda muhim o‘rin tutdi.
Hozirgi vaqtda Cerebras sun’iy intellekt modellarining ishlash jarayonini ta’minlovchi hisoblash chiplari bozorida asosiy ishtirokchilardan biriga aylandi. Kompaniyaning mijozlari ro‘yxatidan OpenAI, G42 korxonasi, Muhammad bin Zayd nomidagi Sun’iy intellekt universiteti hamda Amazon Web Services kabi dunyoning eng yirik tashkilotlari joy olgan.
Bu esa kompaniyaning kelajakdagi mavqeyi yanada mustahkamlanishidan dalolat beradi.
