Texasda aholi noroziligi sababli ma’lumotlar markazlari qurilishi taqiqlandi
Texas shtatining Xill okrugi ma’muriyati qishloq hududlarida ma’lumotlarni qayta ishlash markazlari qurilishiga bir yil muddatga taqiq qo‘yish haqida qaror qabul qildi. Bu haqda Zamin.uz xabar berdi.
Ushbu cheklov mahalliy aholining sun’iy intellekt infratuzilmasi kengayishi oqibatida turmush sifati yomonlashayotganidan noroziligi sababli joriy etildi. Odatda Texas shtati arzon elektr energiyasi va tadbirkorlik uchun qulay qonunchilik tizimi tufayli yirik texnologik loyihalar uchun eng maqbul hudud hisoblanadi.
Biroq so‘nggi vaqtlarda bunday loyihalarning salbiy oqibatlari ko‘proq ko‘zga tashlana boshladi. Vaqtincha taqiq e’lon qilinishiga Provindent Data Centers kompaniyasining Xillsboro shahri yaqinida rejalashtirgan yirik qurilish loyihasi asosiy turtki bo‘ldi.
Shahar boshqaruvidan tashqarida joylashgan hududlarda ruxsatnoma olish jarayonlari ancha sodda bo‘lgani sababli, yirik texnologik operatorlar aynan shu joylarni tanlamoqda. Mahalliy aholi esa bunday markazlar ishga tushishi natijasida elektr energiyasi narxi oshishi, umumiy tarmoqqa tushadigan yuklamaning ortishi va doimiy shovqin kabi muammolardan qattiq xavotirga tushmoqda.
Okrug mutasaddilari sun’iy intellekt infratuzilmasining rivojlanish sur’ati davlat organlarining nazorat qilish imkoniyatlaridan ancha ilgarilab ketganini tan oldilar. Okrug komissari Jim Xolkombning ta’kidlashicha, ko‘plab kompaniyalar Texasning huquqiy nazorat sust bo‘lgan hududlaridan o‘z manfaatlari yo‘lida foydalanmoqda.
Hozirda okrug rahbariyati ushbu yirik texnologik obyektlarning energetika tizimiga va atrof-muhitga ta’sirini chuqurroq o‘rganish maqsadida ishni vaqtincha to‘xtatib turishga qaror qildi. Mazkur qaror shtat darajasida huquqiy bahslarga ham sabab bo‘lmoqda.
Xususan, okrug prokurori va shtat senatori Pol Bettenkurt ushbu moratoriyning amaldagi qonunchilikka nechoqlik mos kelishini tekshirishni talab qilmoqda. Mazkur holat butun Amerika Qo‘shma Shtatlari bo‘ylab kuzatilayotgan sun’iy intellekt taraqqiyoti fonida infratuzilma yetishmovchiligi va energiya quvvatlari tanqisligi qanchalik jiddiy ijtimoiy-iqtisodiy muammoga aylanganini yaqqol ko‘rsatib bermoqda.
Texnologik o‘sish va aholi manfaatlarini muvozanatga keltirish bugungi kunda asosiy vazifa bo‘lib qolmoqda.
