Olimlar koinotda hayot asosi bo‘lgan muhim moddani aniqladi
Xalqaro tadqiqotchilar guruhi yosh yulduzlar tizimining markaziy qismida hayotning asosiy poydevori hisoblangan glitsin aminokislotasining o'ziga xos shakli — metilkarbamat moddasini aniqladi. Bu haqda Zamin.uz xabar berdi.
Ushbu ilmiy yangilik koinot kengliklarida hayot manbalarini izlash borasidagi izlanishlarda yangi davrni boshlab berdi. Gap shundaki, olimlar o'n yillar davomida koinotdan glitsin moddasini topishga urinib kelishgan, biroq bu jarayon juda murakkab kechayotgan edi.
Mazkur tadqiqot Xitoy, Germaniya va Fransiya olimlari hamkorligida, zamonaviy radioteleskoplar majmuasi yordamida amalga oshirildi. Ulkan yulduzlar shakllanayotgan hududda o'tkazilgan kuzatuvlar natijasida metilkarbamatning o'nta mustaqil ko'rsatkichi aniq qayd etildi.
Ushbu modda glitsin bilan bir xil atomlar tarkibiga ega bo'lsa-da, ularning o'zaro joylashuvi va tuzilishi bilan farq qiladi. Bu kashfiyot koinotning kimyoviy tarkibi naqadar boy ekanini yana bir bor isbotladi.
Olimlar mazkur moddaning kutilganidan ancha ko'p miqdorda topilganini haqiqiy ilmiy voqelik deb baholashmoqda. Bu holat fanda ma'lum bo'lgan minimal energiya tamoyillariga mos kelmaydi va koinotdagi kimyoviy jarayonlar biz o'ylagandan ko'ra ancha murakkabroq ekanini ko'rsatadi.
Tadqiqotlar davomida metilkarbamatning hosil bo'lishi kosmik chang zarralari yuzasidagi muz qatlamlarida yuz berishi ma'lum bo'ldi. Ushbu kashfiyot nafaqat glitsin moddasini izlash uchun yangi yo'nalishlarni belgilab beradi, balki yulduzlararo muhitda murakkab organik birikmalar qanday paydo bo'lishini tushunishga ham xizmat qiladi.
Kelgusida boshqa molekulyar bulutlarda o'tkaziladigan kuzatuvlar koinotdagi muvozanat va moddalar almashinuvi haqidagi tasavvurlarimizni tubdan o'zgartirishi mumkin. Bunday izlanishlar yer yuzidagi hayotning kelib chiqish sirlarini anglashda ham muhim ahamiyat kasb etadi.
