Rossiya kompaniyasi suniy intellekt uchun yangi mikrosxemalar ishlab chiqaradi
Rossiyaning Baykal Elektroniks kompaniyasi 2029-2030-yillarga qadar suniy intellekt texnologiyalari uchun mo‘ljallangan yangi mikrosxemalar turkumini ishlab chiqarishni rejalashtirmoqda. Bu haqda Zamin.uz xabar berdi.
Ushbu loyihaning eng muhim jihati shundaki, yangi chiplar Rossiya texnologiyalari tarixida ilk bor Nvidia CUDA dasturiy muhiti bilan to‘liq muvofiqlikda ishlay oladi. Mazkur yangilik sohadagi nufuzli nashrlar tomonidan keng yoritilmoqda.
Kompaniya mutaxassislari hozirda ikki xil turdagi model ustida ish olib bormoqda. Birinchi model Baykal-AI-E1000 deb nomlanib, u asosan sanoat korxonalarini avtomatlashtirish, transport tizimlari va turli kuzatuv qurilmalari uchun mo‘ljallangan.
Ushbu qurilmaning quvvat sarfi juda tejamkor bo‘lib, 30 vattdan oshmaydi. Ishlash tezligi esa 2 gigagersgacha yetadi.
O‘zining texnik imkoniyatlariga ko‘ra, ushbu mahsulot jahon bozoridagi Nvidia Jetson qurilmalari bilan raqobatlasha oladi. Ikkinchi model bo‘lgan Baykal-AI-D1000 esa yirik serverlar va ma’lumotlarni qayta ishlash markazlari uchun mo‘ljallangan kuchli tezlatkich hisoblanadi.
U juda yuqori hisoblash quvvatiga ega bo‘lib, soniyasiga trillionlab amallarni bajarish imkonini beradi. Qurilma 64 gigabaytgacha bo‘lgan tezkor xotira hajmi bilan ta’minlanadi.
Mutaxassislarning taxminiy hisob-kitoblariga ko‘ra, ushbu yuqori texnologiyali mahsulotning narxi 10 000 AQSh dollari atrofida bo‘lishi kutilmoqda. Ushbu ulkan loyihadan ko‘zlangan asosiy maqsad suniy intellekt infratuzilmasida texnologik mustaqillikka erishishdir.
Shuningdek, xorijiy yetkazib beruvchilarga, ayniqsa, hozirda bozorda mutlaq yetakchi bo‘lgan Nvidia kompaniyasiga qaramlikni sezilarli darajada kamaytirish ko‘zda tutilgan. CUDA texnologiyasining qo‘llab-quvvatlanishi esa dasturchilar uchun mavjud dasturiy ta’minotlarni yangi chiplarga oson ko‘chirish va ulardan samarali foydalanish imkonini beradi.
Bu qadam loyihaning tijoriy muvaffaqiyatini ta’minlashda strategik ahamiyatga ega deb baholanmoqda.
