Sud Ilon Maskning OpenAI kompaniyasiga qarshi da’vosini rad etdi
Oklend federal sudi taniqli tadbirkor Ilon Maskning OpenAI kompaniyasiga qarshi bergan da’vosini ko‘rib chiqib, uni qanoatlantirishni rad etdi. Bu haqda Zamin.uz xabar berdi.
Sud qarorida ta’kidlanishicha, milliarder o‘zi asos solishda qatnashgan tashkilotga nisbatan e’tirozlarini juda kech bildirgan. Hakamlar hay’ati ikki soatga ham yetmagan muhokamadan so‘ng bir ovozdan shunday xulosaga keldi.
Ushbu sud jarayoni zamonaviy texnologiyalar olamidagi eng yirik huquqiy bahslardan biri sifatida baholanmoqda. Ilon Mask 2024-yilda taqdim etgan da’vo arizasida OpenAI rahbari Sem Altman va prezident Greg Brokmanni dastlabki kelishuvlarni buzganlikda ayblagan edi.
Maskning iddaosiga ko‘ra, loyiha boshida insoniyat manfaati uchun xizmat qiluvchi notijorat tashkilot sifatida tuzilgan, biroq keyinchalik Microsoft kabi yirik hamkorlardan milliardlab dollar sarmoya qabul qilib, foyda ko‘zlovchi biznesga aylangan. Tadbirkor ushbu loyihaga o‘z vaqtida 38 million dollar sarmoya kiritganini va kompaniya tuzilmasi o‘zgartirilgach, boshqaruv jarayonidan chetlatilganini asosiy e’tiroz sifatida ko‘rsatdi.
OpenAI vakillari esa sudda Maskning da’volari mutlaqo asossiz ekanini ta’kidladilar. Ularning fikricha, milliarder sun’iy intellekt bozori ulkan moliyaviy o‘sishga erishganidan so‘nggina e’tiroz bildirishga qaror qilgan.
O‘n bir kun davom etgan sud jarayoni davomida tomonlar bir-birining ishbilarmonlik obro‘siga putur yetkazuvchi dalillarni keltirishga urindilar. Yakunda sud Maskning da’volarini o‘z vaqtida taqdim etilmagan deb topdi.
Ma’lumot o‘rnida aytish joizki, OpenAI kompaniyasi 2015-yilda Sem Altman, Ilon Mask va boshqa tadbirkorlar tomonidan notijorat tashkilot sifatida tashkil etilgan edi. Mask 2018-yilda manfaatlar to‘qnashuvi sababli direktorlar kengashini tark etgan.
Shundan so‘ng, 2019-yilda kompaniya yirik investitsiyalarni jalb qilish maqsadida maxsus tijorat bo‘linmasini tashkil qildi. Bugungi kunda OpenAI jadal rivojlanib, Google DeepMind, Anthropic hamda Maskning o‘ziga tegishli xAI kompaniyasi bilan sun’iy intellekt sohasida kuchli raqobat olib bormoqda.
