OpenAI kompaniyasi o‘z aksiyalarini fond bozoriga chiqarishga tayyorlanmoqda
Ilon Mask OpenAI kompaniyasining tuzilmasi, rahbariyati va moliyaviy holatiga qarshi qaratilgan sud jarayonida maglubiyatga uchraganidan so‘ng, sun’iy intellekt sohasidagi ushbu yirik tashkilot o‘z aksiyalarini fond bozoriga chiqarishga tayyorligini bildirdi. Bu haqda Zamin.uz xabar berdi.
Dunyoga mashhur nashrlarning ma’lumotlariga ko‘ra, kompaniya yaqin oylar ichida o‘z qimmatli qog‘ozlarini ommaviy savdoga qo‘yishni rejalashtirmoqda. Ushbu jarayon texnologiya olamidagi eng kutilgan voqealardan biri bo‘lishi taxmin qilinmoqda.
Kompaniya rahbari Sem Altman sentyabr oyiga qadar barcha tayyorgarlik ishlarini yakunlab, ommaviy savdolarni boshlash niyatida ekanini ma’lum qildi. Mashhur ChatGPT xizmati asoschisi hisoblangan OpenAI mazkur murakkab jarayonni muvaffaqiyatli amalga oshirish maqsadida dunyoning yetakchi investitsiya banklari bilan hamkorlik o‘rnatgan.
Mutaxassislarning fikricha, aksiyalarni birlamchi joylashtirish uchun zarur bo‘lgan maxfiy hujjatlar yaqin kunlar yoki haftalar ichida tegishli tartibga soluvchi davlat idoralariga taqdim etilishi mumkin. OpenAI kompaniyasining fond bozoriga chiqishi kutilayotgan bir vaqtda, jamoatchilik Ilon Maskka tegishli bo‘lgan SpaceX korxonasining ham shunga o‘xshash rejalari bilan qiziqmoqda.
Hozirgi kunda Maskning sun’iy intellekt yo‘nalishidagi yangi loyihalari OpenAI uchun asosiy raqobatchi sifatida ko‘rilmoqda. Shu sababli, ikki texnologiya giganti o‘rtasidagi kurash endilikda sud zallaridan moliya bozorlariga ko‘chishi kutilmoqda.
Ilon Mask o‘zi asos solgan, biroq keyinchalik tark etgan kompaniyani sud orqali to‘xtatishga urinib ko‘rgan edi, ammo uning bu harakatlari natija bermadi. Endilikda sarmoyadorlar va bozor ishtirokchilari qaysi kompaniyaning aksiyalari ko‘proq qiziqish uyg‘otishini hamda yuqori daromad keltirishini diqqat bilan kuzatib borishmoqda.
Hozircha OpenAI ma’muriyati ushbu yangiliklar yuzasidan rasmiy bayonot berishdan tiyilib turibdi. Shunga qaramay, soha mutaxassislari ushbu qadam sun’iy intellekt texnologiyalarini rivojlantirish uchun yangi sarmoyaviy imkoniyatlar ochishiga ishonch bildirishmoqda.
