«Base Power» PJM hududida akkumulyator sotishni boshladi
AQSHning energetika sohasidagi istiqbolli startaplaridan biri hisoblangan Base Power kompaniyasi Illinoys shtatida o‘zining katta uy akkumulyatorlari tizimini sotishni boshladi. Bu haqda Zamin.uz xabar berdi.
Bu qadam nafaqat kompaniya ko‘lamini kengaytiradi, balki mamlakatning eng yirik elektr tarmog‘i operatori bo‘lmish PJM Interconnection hududiga birinchi marta kirib borishni anglatadi. Mazkur huduz so‘nggi vaqtlarda ma’lumotlar markazlarining keskin ko‘payishi ortidan jiddiy energiya tanqisligiga duch kelmoqda.
Bu haqda Techcrunch.com xabar beradi. PJM operatori boshqaradigan hudud, jumladan Shimoliy Virjiniya, dunyodagi eng zich ma’lumotlar markazlari joylashgan nuqtalardan biri hisoblanadi.
Yangi energiya manbalarining yetishmasligi va talabning ortishi natijasida hududda elektr energiyasining ulgurji narxlari so‘nggi bir yil ichida deyarli ikki baravar qimmatlashdi. Canary Media nashrining xabar berishicha, vaziyat shu darajaga yetganki, mintaqadagi eng yirik kommunal xizmat ko‘rsatuvchi korxonalardan biri bo‘lgan AEP bozorni tark etish bilan tahdid qilmoqda.
Virtual elektr stansiyalari va innovatsion yondashuv Base Power bundan ikki yil avval Texasda tashkil etilgan bo‘lib, uning asosiy g‘oyasi turar joy akkumulyatorlari asosida virtual elektr stansiyasini yaratishga qaratilgan. Kompaniya taklif etayotgan akkumulyatorlarning quvvati 25 kilovat soatdan boshlanadi, bu esa bozordagi ko‘plab raqobatchilarning mahsulotidan kattaroqdir.
Muhim jihati shundaki, Base Power akkumulyatorlarni shunchaki sotmaydi, balki mijozlardan elektr energiyasini aynan o‘zidan sotib olishni talab qiladi. Illinoys shtatida kompaniya taklif qilayotgan tariflar mahalliy ComEd yetkazib beruvchisining narxlaridan 25 foizga arzonroqdir.
Bu iste’molchilar uchun ham, tarmoq barqarorligi uchun ham manfaatli hisoblanadi. Startap elektr energiyasi arzon bo‘lganda akkumulyatorlarni quvvatlaydi va tarmoqda yuklama ortib, energiya taqchilligi yuzaga kelganda zaxiradagi quvvatni ishga soladi.
Byurokratik to‘siqlarni chetlab o‘tish PJM operatori yangi energiya manbalarini tarmoqqa ulash borasidagi arizalarni ko‘rib chiqishni 2022-yilda to‘xtatib qo‘ygan edi va faqat joriy yilning aprel oyidagina bu jarayonni qayta tikladi. Biroq Base Power o‘zining biznes modeli tufayli ushbu byurokratik navbatlarni chetlab o‘tishga muvaffaq bo‘lmoqda.
Kompaniya asoschisi va rahbari Zach Dellning tushuntirishicha, akkumulyatorlarni bevosita xonadonlarga, ya’ni mavjud ulanish nuqtalariga o‘rnatilgani sababli, yangi tarmoqlararo ulanish ruxsatini kutishga hojat qolmaydi. Kompaniyaning rivojlanish sur’atlari yirik investorlar e’tiborini tortmoqda.
Oktyabr oyida Addition boshchiligidagi investitsiya raundida 1 milliard dollar jalb qilingan bo‘lsa, undan avvalroq Andreessen Horowitz, Lightspeed Venture Partners va Valor Equity Partners kabi gigantlar startapga 200 million dollar tikkan edi. Hozirda Base Power Texasning o‘zida 500 megavat soatdan ortiq energiya saqlash quvvatiga ega bo‘lib, kompaniya o‘sishda davom etmoqda.
