Asus ROG NUC 20 yillik maxsus mini kompyuterni taqdim etdi
Kompyuter texnologiyalari bozorida yuqori unumdorlikka ega qurilmalari bilan tanilgan Asus kompaniyasi Republic of Gamers brendining yigirma yilligi munosabati bilan maxsus mini kompyuter modelini namoyish etdi. Bu haqda Zamin.uz xabar berdi.
ROG NUC 20th Anniversary Edition deb nomlangan ushbu qurilma nafaqat o'zining ixcham o'lchamlari, balki rekord darajadagi narzi bilan ham texnologiya olami e'tiborini tortdi. Ushbu yubiy nashri Xitoy bozorida 44 ming yuan yoki taxminan 6480 AQSH dollari qiymatida sotuvga chiqdi.
Bunday yuqori narx qurilmaning cheklangan nusxada ishlab chiqarilgani va uning ichiga joylashtirilgan eng so'nggi texnologik yechimlar bilan izohlanadi. Yangi mini kompyuter qora va oltin ranglar uyg'unligidagi yarim shaffof korpusga ega bo'lib, uning hajmi atigi 3 litrni tashkil etadi.
Qurilmaning ichki qismida 24 yadroli Intel Core Ultra 9 290HX Plus protsessori hamda 24 gigabayt GDDR7 xotirali NVIDIA GeForce RTX 5090 Laptop videokartasi joylashgan. Bu kabi texnik ko'rsatkichlar mini kompyuter segmenti uchun misli ko'rilmagan quvvat hisoblanadi.
Qurilmaning asosiy texnik xususiyatlari quyidagilardan iborat: 64 gigabayt operativ xotira, uni 128 gigabayt gacha kengaytirish imkoniyati mavjud; 2 terabayt hajmli PCIe Gen6 NVMe SSD xotira qurilmasi; bug'lanish kamerasi va uchta ventilyatordan iborat sovutish tizimi; 380 vatt quvvatga ega tashqi blok orqali energiya ta'minoti. Asus muhandislari qurilmaning ergonomikasiga ham alohida e'tibor qaratishgan.
Komplektda maxsus olinadigan taglik mavjud bo'lib, u o'rnatilgan akselerometr yordamida kompyuterning gorizontal yoki vertikal holatini aniqlaydi va tizim ishini moslashtiradi. Bu foydalanuvchiga ish stolida joyni maksimal darajada tejash imkonini beradi.
Kichik hajmga qaramay, ROG NUC 20th Anniversary Edition keng ko'lamli portlar bilan jihozlangan. Old panelda USB-A, USB-C va audio konnektor joylashgan bo'lsa, orqa tomonda Thunderbolt 4, to'rtta USB-A, ikkitadan HDMI 2.1 va DisplayPort 2.1 portlari mavjud.
Shuningdek, 2.5 gigabaytli Ethernet tarmog'i ham ko'zda tutilgan. Simsiz aloqa uchun Intel Killer Wi-Fi 7 va Bluetooth 5.4 modullari javob beradi, bu esa onlayn o'yinlar va katta hajmdagi ma'lumotlarni uzatishda maksimal tezlikni ta'minlaydi.
Mutaxassislarning fikricha, ushbu model ommaviy foydalanish uchun emas, balki brend ishqibozlari va kolleksionerlar uchun mo'ljallangan ramziy mahsulotdir. Ushbu mini kompyuter nafaqat o'yinlar, balki murakkab grafik ishlov berish va sun'iy intellekt algoritmlari bilan ishlash uchun ham bemalol xizmat qila oladi.
Hozircha qurilmaning global bozordagi sotuvlari va boshqa mintaqalardagi narxi haqida rasmiy ma'lumotlar berilmagan.
