WhatsApp foydalanuvchilarga maxsus nom tanlash imkonini berdi
Dunyoning eng ommabop messenjerlaridan biri hisoblangan WhatsApp uzoq kutilgan yangilikni e’lon qildi. Bu haqda Zamin.uz xabar berdi.
Endilikda foydalanuvchilar o‘z shaxsiy telefon raqamlarini oshkor qilmagan holda muloqot qilishlari uchun maxsus foydalanuvchi nomlarini band qilishlari mumkin bo‘ladi. Bu funksiya platformadagi shaxsiy maxfiylik darajasini sezilarli darajada oshirishi kutilmoqda.
Bu haqda Techcrunch.com xabar beradi. Meta kompaniyasiga tegishli messenjer bir necha yildan beri ushbu funksiya ustida ish olib borayotgan edi.
Ma’lumotlarga ko‘ra, foydalanuvchi nomlarini band qilish jarayoni allaqachon boshlangan, biroq funksiyaning to‘liq ishga tushishi joriy yilning oxiriga qadar bosqichma-bosqich amalga oshiriladi. Foydalanuvchilar uchdan o‘ttigacha belgidan iborat bo‘lgan takrorlanmas nomlarni tanlash imkoniyatiga ega bo‘ladilar.
Xavfsizlik va shaxsiy maxfiylik WhatsApp mahsulotlar bo‘yicha vitse-prezidenti Alice Newton-Rexning ta’kidlashicha, telefon raqami juda shaxsiy ma’lumot bo‘lib, u inson hayotining ko‘plab boshqa jabhalari bilan bog‘liq. Yangi tanishgan insoningizga yoki hamkasbingizga darhol raqam berish noqulaylik tug‘dirishi mumkin.
Foydalanuvchi nomlari esa aynan kimga raqamingizni ko‘rsatishni nazorat qilish imkonini beradi. Tizimning o‘ziga xos jihati shundaki, foydalanuvchi nomlari ilova ichida qidiruv orqali topilmaydi.
Ya’ni, siz bilan bog‘lanmoqchi bo‘lgan shaxs sizning aniq foydalanuvchi nomingizni bilishi shart. Shuningdek, xavfsizlikni kuchaytirish maqsadida maxsus kod o‘rnatish funksiyasi ham qo‘shiladi — bu kodni bilmagan begona shaxslar sizga xabar yozolmaydi.
Band qilish tartibi va cheklovlar Hozirda Meta mashhur shaxslar, tashkilotlar va alohida foydalanuvchilar uchun nomlarni band qilishni boshlagan. Oddiy foydalanuvchilar o‘z mamlakatlarida ushbu imkoniyat ochilishi bilan maxsus bildirishnoma oladilar.
Shundan keyin sozlamalar, hisob, foydalanuvchi nomi bo‘limi orqali kerakli nomni tanlash mumkin bo‘ladi. Kompaniya uch milliarddan ortiq foydalanuvchilar bazasida nomlar takrorlashingining oldini olish uchun ushbu band qilish tizimini joriy etmoqda.
Agar foydalanuvchi biznes egasi yoki kontent yaratuvchisi bo‘lsa, u o‘zining Facebook yoki Instagram tarmog‘idagi nomini WhatsApp uchun ham saqlab qolishi tavsiya etiladi. Ta’kidlash joizki, Telegram, Signal va Wire kabi raqobatchi messenjerlarda foydalanuvchi nomlari tizimi bir necha yildan beri mavjud.
WhatsApp ushbu funksiyani joriy etish orqali o‘z raqobatchilari bilan maxfiylik borasidagi farqni yopishga harakat qilmoqda. Shunga qaramay, yangi akkaunt ochish uchun baribir telefon raqami talab qilinishi o‘zgarishsiz qoladi.
