Yangi biznes samolyoti parvoz tezligi bo'yicha rekord o'rnatdi
Aviatsiya olamida yangi rekord o‘rnatildi: Bombardier kompaniyasining Global 8000 rusumli biznes samolyoti afsonaviy Konkord layneridan keyingi eng tezkor fuqarolik havo kemasiga aylandi. Bu haqda Zamin.uz xabar berdi.
Mazkur samolyot Los-Anjelesdan Britaniyaning Farnboro shahriga qadar bo‘lgan masofani rekord darajadagi qisqa vaqt ichida bosib o‘tib, o‘zining texnik imkoniyatlarini amalda isbotladi. Mutaxassislarning ma’lumotiga ko‘ra, parvoz davomida havo kemasi soatiga 1140 kilometr tezlikka erishgan.
Sakkiz ming yetti yuz kilometrlik masofani kuchli qarshi shamolga qaramay, bor-yo‘g‘i 8 soatu 46 daqiqada bosib o‘tishga muvaffaq bo‘lingan. Bu ko‘rsatkich ushbu yo‘nalishdagi avvalgi rekorddan sezilarli darajada yuqoridir.
Mazkur parvoz Farnboro xalqaro aviasalonidagi rasmiy taqdimot arafasida amalga oshirildi. Bombardier Global 8000 nafaqat tezligi, balki parvoz uzoqligi bilan ham mutaxassislarni hayratda qoldirmoqda.
Samolyotning maksimal tezligi tovush tezligiga juda yaqinlashadi, parvoz masofasi esa taxminan 14 800 kilometrni tashkil etadi. Bunday texnik tavsiflar dunyoning eng yirik megapolislari o‘rtasida to‘xtovsiz va o‘ta tezkor reyslarni amalga oshirish imkonini beradi.
Ishlab chiquvchilar faqat tezlik bilan cheklanib qolmasdan, yo‘lovchilar qulayligiga ham alohida e’tibor qaratishgan. Samolyot salonidagi havo bosimi dengiz sathiga yaqin darajada ushlab turiladi.
Bu uzoq masofali parvozlar paytida yo‘lovchilarning charchashini sezilarli darajada kamaytiradi va inson organizmiga tushadigan og‘irlikni yumshatadi. Yana bir muhim jihati shundaki, ushbu havo kemasi ko‘plab boshqa uzoq masofali biznes samolyotlari qo‘na olmaydigan qisqa va murakkab aerodromlarda ham uchish va qo‘nish imkoniyatiga ega.
Bu esa ishbilarmon doira vakillari va yuqori martabali mehmonlar uchun logistika nuqtayi nazaridan katta ustunlik beradi. Shu bilan birga, Bombardier kompaniyasi yangi model uchun maxsus ekologik deklaratsiya olganini ham e’lon qildi.
Ushbu hujjat samolyotning ishlab chiqarilishidan tortib, to foydalanishdan chiqarilishigacha bo‘lgan butun jarayon davomida atrof-muhitga ko‘rsatadigan ta’sirini mustaqil baholaydi. Kompaniya vakillarining ta’kidlashicha, Bombardier hozirda o‘zining seriyali modellari uchun bunday shaffof ekologik hisobotlarni e’lon qilayotgan dunyodagi yagona ishlab chiqaruvchi bo‘lib qolmoqda.
Bu esa zamonaviy aviatsiyada nafaqat tezlik va hashamat, balki tabiatni muhofaza qilish ham eng ustuvor yo‘nalishga aylanayotganidan dalolat beradi. Yangi layner yaqin yillarda yuqori toifadagi parvozlar bozorida yetakchilikni qo‘lga kiritishi kutilmoqda.
