«Yunayted Eyrlayns» «Emireyts» rad etgan samolyotlarni sotib olmoqchi

Amerika Qo‘shma Shtatlarining yirik aviatashuvchilaridan biri bo‘lgan United Airlines kompaniyasi Boeing korporatsiyasi tomonidan ishlab chiqarilgan, biroq bir necha yil davomida omborlarda saqlangan 20 ga yaqin Boeing 777-9 samolyotlarini sotib olish imkoniyatlarini o‘rganmoqda. Bu haqda One.uz xabar beradi.

Ushbu havo kemalari dastlab Birlashgan Arab Amirliklarining Emirates aviakompaniyasi uchun yig‘ilgan edi, biroq Dubay giganti turli texnik va iqtisodiy sabablarga ko‘ra ularni qabul qilishdan bosh tortgan. Mazkur kelishuv amalga oshsa, United Airlines ushbu modelning AQSHdagi ilk sohibiga aylanishi kutilmoqda.

Gap 2019-2021-yillar oralig‘ida, ya’ni Boeing 777X dasturi hali to‘liq rasmiy sinovlardan o‘tmasdan oldin ishlab chiqarilgan ilk turkum haqida bormoqda. Sertifikatlash jarayonining kutilganidan ancha ko‘p vaqtga cho‘zilib ketishi oqibatida ushbu laynerlar o‘z vaqtida foydalanishga topshirilmadi va uzoq muddat maxsus maydonlarda turib qoldi.

Bu holat samolyotlarning texnik holati va ulardan foydalanishning iqtisodiy samaradorligi borasida mutaxassislar o‘rtasida turli shubhalarni yuzaga keltirdi. Emirates aviakompaniyasining rad javobi Emirates aviakompaniyasi rahbari Tim Klark ushbu samolyotlardan voz kechish sabablarini ochiq bayon etgan.

Uning ta’kidlashicha, dastlabki ishlab chiqarilgan nusxalarni yakuniy standartlarga moslashtirish uchun juda katta hajmdagi qayta jihozlash ishlarini bajarish talab etiladi. Bu esa nafaqat qo‘shimcha vaqt, balki ulkan moliyaviy mablag‘ sarflanishini anglatadi.

Bundan tashqari, Emirates rahbariyati uzoq muddatli saqlash sharoitlari samolyotlarning umumiy xizmat muddatiga salbiy ta’sir ko‘rsatganidan xavotirda ekanini bildirgan. Klark hatto loyihaning kechikishidan noroziligini keskin shaklda ifoda etib, ushbu havo kemalarining hozirgi holati ulardan samarali foydalanishga to‘sqinlik qilishini ta’kidlagan edi.

Boeing va United Airlines uchun yangi imkoniyatlar Agar muzokaralar ijobiy yakun topsa, United Airlines o‘z parkini sezilarli darajada yangilash va yo‘lovchi tashish quvvatini oshirish imkoniga ega bo‘ladi. Boeing korporatsiyasi uchun esa bu kelishuv omborlarda saqlash xarajatlarini oshirayotgan hamda sotilishi qiyin bo‘lgan samolyotlar muammosini hal qilish uchun qulay imkoniyatdir.

Hozircha har ikki tomon ham ushbu masala yuzasidan rasmiy bayonot berishdan tiyilmoqda. Soha tahlilchilarining fikriga ko‘ra, mazkur kelishuv amalga oshishi uchun Boeing kompaniyasi United Airlines aviakompaniyasiga sezilarli darajada chegirmalar taqdim etishi yoki samolyotlarni zamonaviy talablarga moslashtirish xarajatlarini to‘liq o‘z zimmasiga olishi lozim bo‘ladi.

Boeing 777 turkumidagi samolyotlar dunyo aviatsiya bozorida, jumladan O‘zbekistonda ham yuqori baholanadi. Milliy aviatashuvchimiz parkidagi ushbu rusumdagi laynerlar uzoq masofali parvozlarda o‘zining ishonchliligi va samaradorligini isbotlagan.

Shu sababli, 777X oilasining keyingi taqdiri va uning jahon bozoriga chiqishi butun aviatsiya hamjamiyati, jumladan mintaqamizdagi tashuvchilar uchun ham muhim ahamiyat kasb etadi.