Apple kelgusi yili ilk buklama ekranli smartfonini taqdim etadi
Apple kompaniyasi o‘z tarixidagi ilk buklama ekranli iPhone qurilmasini kelgusi yilning 8-sentabr kuni ommaga taqdim etishni rejalashtirmoqda. Bu haqda One.uz xabar beradi.
Mazkur yangi gadjet iPhone 18 turkumidagi smartfonlar bilan bir qatorda namoyish etilishi kutilayotgan bo‘lsa-da, uning sotuvga chiqish muddati texnik va logistik to‘siqlar sababli kechikishi mumkin. Soha mutaxassislarining fikricha, Apple buklama ekranli qurilmalar bozoriga raqobatchilaridan biroz kechroq kirib kelayotgan bo‘lsa ham, mahsulot sifatiga alohida urg‘u bermoqda.
Biroq ishlab chiqarish zanjiridagi uzilishlar va murakkab sinov jarayonlari sababli yangi smartfonning global savdosi kutilganidan kechroq boshlanishi ehtimoli yuqori. Ishlab chiqarishdagi qiyinchiliklar va cheklovlar Ta’minot zanjiri vakillaridan olingan ma’lumotlarga ko‘ra, ayni paytda Apple muhandislari bir vaqtning o‘zida bir nechta jiddiy masalalar ustida bosh qotirmoqda.
Bular sirasiga butlovchi qismlarni yetkazib berishdagi muammolar, qurilmaning chidamliligini tekshiruvchi ko‘p bosqichli sinovlar hamda yakuniy narx siyosatini belgilash kiradi. Aynan shu omillar mahsulotning butun dunyo bo‘ylab bir vaqtda savdoga chiqarilishiga yo‘l qo‘ymasligi mumkin.
Dastlabki ma’lumotlarga ko‘ra, yangi buklama iPhone modellari an’anaviy smartfonlar bilan bir vaqtda do‘kon peshtaxtalariga chiqmaydi. Kompaniya dastlab faqat AQSH bozorida cheklangan miqdordagi qurilmalarni sotuvga chiqarishni, shundan so‘nggina Xitoy va boshqa yirik mintaqalarga kirib borishni rejalashtirmoqda.
Avstraliya va Yevropa kabi hududlardagi xaridorlar ushbu flagmanni qo‘lga kiritish uchun taqdimotdan keyin yana bir necha oy kutishlariga to‘g‘ri keladi. Narx siyosati va raqobat muhiti Yangi qurilmaning narxi borasida ham turli taxminlar ilgari surilmoqda.
Buklanuvchi ekran texnologiyasi va o‘ziga xos butlovchi qismlarning tannarxi yuqoriligi sababli, ushbu smartfon hozirgi Apple modellaridan sezilarli darajada qimmat bo‘lishi kutilmoqda. Tahlilchilarning hisob-kitoblariga ko‘ra, yangi gadjet bozordagi eng yaqin raqobatchisi hisoblangan Samsung Galaxy Fold turkumidagi qurilmalardan ham qimmatroq sotilishi mumkin.
Xususan, ayrim prognozlarga ko‘ra, Apple’ning ilk buklama smartfoni raqobatchilarning yuqori xotirali modellaridan taxminan 700 dollargacha qimmatroq bo‘lishi ehtimoldan xoli emas. Kompaniya foydalanuvchilarga mukammal sifat taqdim etish maqsadida ekran chidamliligi va buklanish mexanizmini takomillashtirishga katta mablag‘ sarflamoqda.
Sentyabr oyidagi rasmiy tadbirda qurilmaning barcha texnik xususiyatlari va aniq sotuv muddatlari haqida batafsil ma’lumot berilishi kutilmoqda.
