Apple smartfonlarni bozorga chiqarish tartibini tubdan o‘zgartirmoqda
Apple kompaniyasi o‘zining ko‘p yillik an’analaridan voz kechib, iPhone smartfonlarini taqdim etish va bozorga chiqarish tartibini tubdan o‘zgartirishni rejalashtirmoqda. Bu haqda One.uz xabar beradi.
Economic Daily News nashri hamda texnologik gigantning asosiy hamkorlaridan biri bo‘lgan Pegatron korxonasi ma’lumotlariga ko‘ra, yangi avlod qurilmalari endi bir vaqtning o‘zida emas, balki ma’lum vaqt oralig‘ida bosqichma-bosqich sotuvga chiqariladi. Ushbu strategik o‘zgarish Apple kompaniyasining so‘nggi o‘n yillikdagi eng yirik islohotlaridan biri bo‘lishi kutilmoqda.
Hozirga qadar amal qilib kelingan tartibga muvofiq, Apple har yili kuz faslida barcha yangi smartfon modellarini bitta tadbir doirasida e’lon qilar edi. Biroq ta’minot zanjiridan olingan so‘nggi xabarlar kompaniya ushbu yondashuvdan voz kechayotganini ko‘rsatmoqda.
Bu kabi o‘zgarishlar global texnologiya bozorida xaridorlarning tanlov imkoniyatlariga va kompaniyaning yillik savdo dinamikasiga sezilarli ta’sir ko‘rsatishi tayin. Taqdimotning ikki bosqichli tizimi Pegatron kompaniyasi bergan ma’lumotlarga tayangan holda aytish mumkinki, standart iPhone 18 modeli odatdagiidek sentabr oyida sotuvga chiqmaydi.
Taxminlarga ko‘ra, 2026-yilning kuzida Apple faqat o‘zining eng yuqori toifadagi flagmanlari — iPhone 18 Pro, iPhone 18 Pro Max hamda ko‘pchilik intiqib kutayotgan buklama dizayndagi iPhone Ultra modellarini namoyish etadi. Ushbu qurilmalar texnologik jihatdan eng ilg‘or bo‘lib, yuqori narx segmentini egallaydi.
Shu bilan birga, keng ommaga mo‘ljallangan bazaviy iPhone 18 smartfoni 2027-yilning birinchi choragida, aniqrog‘i mart oyida sotuvga chiqarilishi kutilmoqda. Agar ushbu reja tasdiqlansa, yangi avlod qurilmalarining to‘liq tarkibi bozorga chiqishi deyarli yarim yilga cho‘ziladi.
Bu esa kompaniya tarixidagi eng barqaror savdo va taqdimot grafigining yakunlanishini anglatadi. Strategik o‘zgarishlarning sabablari Mazkur yangilik Apple uchun kutilmagan qaror emas.
iPhone 11 modelidan boshlab barcha versiyalar sentabr oyida birgalikda taqdim etib kelinayotgan edi. Biroq nufuzli tahlilchilar, jumladan Min-Chi Kuo va boshqa insayderlar, kompaniya ishlab chiqarish quvvatlarini muvozanatlash uchun taqdimotlarni bo‘lishi mumkinligini avval ham ta’kidlagan edilar.
Apple kompaniyasining boshqa bir yirik yetkazib beruvchisi — Largan Precision korxonasi ham ushbu grafik o‘zgarishiga tayyorgarlik ko‘rilayotganini tasdiqlagan. Mutaxassislarning fikricha, bunday yondashuv butlovchi qismlar ta’minotidagi yuklamani kamaytirishga va ishlab chiqarish jarayonini bir maromda ushlab turishga yordam beradi.
Garchi iste’molchilar barcha yangi modellarni bir vaqtda sotib olish imkoniyatidan mahrum bo‘lsalar-da, bu qadam Apple kompaniyasiga yil davomida barqaror savdo ko‘rsatkichlarini saqlab qolish va brendga bo‘lgan qiziqishni so‘ndirmaslik imkonini beradi.
