OpenAI o'smirlar uchun ChatGPTning maxsus versiyasini ishga tushirmoqda
OpenAI kompaniyasi 13 yoshdan 17 yoshgacha bo‘lgan o‘smirlar uchun maxsus moslashtirilgan ChatGPT versiyasini ishga tushirmoqda. Bu haqda One.uz xabar beradi.
Mazkur yangilanish voyaga yetmagan foydalanuvchilarning ruhiy salomatligini asrash, ularni zararli ma’lumotlardan himoya qilish va o‘quv jarayonida mustaqil fikrlash qobiliyatini rivojlantirishga qaratilgan. Yangi tizim o‘smirlarga tayyor javoblarni taqdim etish o‘rniga, ularni masalalarni bosqichma-bosqich yechishga va bilimlarini mustahkamlashga yo‘naltiradi.
Financial Times nashrining ma’lumotlariga ko‘ra, ushbu loyihaning jahon miqyosidagi taqdimoti avgust oyining ikkinchi yarmida boshlanishi kutilmoqda. OpenAI bunday choralar orqali sun’iy intellektning yosh avlodga salbiy ta’siri borasidagi jamoatchilik xavotirlariga javob bermoqda.
O‘smirlar uchun mo‘ljallangan versiyada o‘z-o‘ziga zarar yetkazish, zo‘ravonlik, noto‘g‘ri ovqatlanish odatlari va axloqsiz mazmundagi materiallarga nisbatan filtrlash tizimi sezilarli darajada kuchaytirilgan. Ota-onalar nazorati va xavfsizlik choralari Kompaniya ota-onalar uchun nazorat imkoniyatlarini ham kengaytirmoqda.
Endilikda ota-onalar nafaqat keskin xavfli vaziyatlar, balki farzandlarining ruhiy holatiga ta’sir ko‘rsatishi mumkin bo‘lgan boshqa mavzular bo‘yicha ham ogohlantirishlar olib turishadi. Shu bilan birga, 13 yoshga to‘lmagan bolalarning tizimdan foydalanishi taqiqlanadi, voyaga yetmaganlar uchun esa albatta ota-onaning roziligi talab etiladi.
Tizim foydalanuvchining yoshini aniqlashda nafaqat u ko‘rsatgan ma’lumotlarga, balki uning muloqot jarayonidagi xulq-atvor belgilariga ham tayanadi. Yangi versiyada foydalanuvchilarning salomatligini asrash maqsadida dam olish vaqtlari haqidagi eslatmalar, tungi vaqtda foydalanishni cheklovchi sukunat soatlari kabi foydali funksiyalar joriy etiladi.
Bu o‘smirlarning virtual olamga haddan tashqari bog‘lanib qolishining oldini olishga xizmat qiladi. Ta’lim jarayonidagi o‘zgarishlar OpenAI tomonidan kiritilayotgan eng muhim yangiliklardan biri bu ta’lim rejimining joriy etilishidir.
Ushbu rejimda sun’iy intellekt o‘quvchining o‘rniga vazifalarni bajarib bermaydi, balki yo‘naltiruvchi savollar orqali mavzuni tushunishga ko‘maklashadi. Masalan, murakkab masala yuzasidan bot tayyor yechimni bermasdan, muammoni mayda qismlarga ajratadi va foydalanuvchini mustaqil xulosa chiqarishga undaydi.
Kompaniya vakillarining ta’kidlashicha, o‘smirlarning aksariyati ushbu texnologiyadan aynan o‘qish maqsadida foydalanadi. Shu sababli, xizmatni oddiy ma’lumot yetkazuvchi vositadan aqlli repetitor darajasiga ko‘tarish asosiy vazifa qilib belgilangan.
Bu yondashuv o‘quvchilarning tanqidiy fikrlash qobiliyatini o‘stirishga va olingan bilimlarni mustahkamlashga yordam beradi.
