Apple yangi rahbar Jon Ternusga ulkan loyiha kutmoqda
Apple kompaniyasining rahbariyat tarkibida muhim o‘zgarish yuz berdi: o‘n besh yil davomida bosh direktor lavozimida faoliyat yuritgan Tim Kuk o‘z o‘rnini Jon Ternusga bo‘shatib berdi. Bu haqda One.uz xabar beradi.
Ilgari kompaniyaning apparat muhandisligi bo‘yicha katta vitse-prezidenti bo‘lib ishlagan Ternus endilikda texnologiya olamining eng yirik korporatsiyasini boshqaradi. Ushbu tayinlov Apple o‘zining yangi mahsulotlari va sun’iy intellekt sohasidagi ulkan rejalarini e’lon qilish arafasida turgan mas’uliyatli pallaga to‘g‘ri keldi.
Jon Ternus xodimlarga yo‘llagan ilk rasmiy murojaatida kelgusi haftada kutilayotgan taqdimotning ahamiyatiga alohida to‘xtalib o‘tdi. Uning so‘zlariga ko‘ra, jamoani favqulodda yirik va texnologik jihatdan boyitilgan tadbir kutmoqda.
Yangi rahbar kompaniya oldida turgan ulkan loyihalar va ishlab chiqarilishi kutilayotgan mahsulotlar ustida ishlashdan mamnunligini bildirib, Apple o‘z an’analariga sodiq qolgan holda innovatsiyalar sari intilishini ta’kidladi. Yangi qurilmalar va sun’iy intellekt imkoniyatlari Kompaniyaning an’anaviy sentyabr taqdimotida asosiy e’tibor yangi avlod iPhone telefonlariga qaratilishi kutilmoqda.
Soha mutaxassislarining taxminlariga ko‘ra, Apple ushbu tadbirda o‘zining ilk buklamafonini namoyish etishi mumkin. Bu qadam brendning mobil qurilmalar bozoridagi mavqeini yanada mustahkamlashga va raqobatchilar bilan kurashda yangi bosqichga ko‘tarilishiga xizmat qiladi.
Shu bilan birga, taqdimotning eng muhim yangiliklaridan biri Siri ovozli yordamchisining tubdan yangilanishi bo‘ladi. Sun’iy intellekt asosida ishlaydigan ushbu tizim endilikda dunyodagi eng ilg‘or chatbotlar bilan raqobatlasha oladigan darajaga yetkazilishi kutilmoqda.
Bu esa foydalanuvchilarga qurilmalar bilan yanada tabiiy va aqlli muloqot qilish imkonini beradi. Kelajakdagi loyihalar va Tim Kukning e’tirofi Jon Ternus faqat yaqin kunlardagi taqdimot bilan cheklanib qolmasdan, kompaniya laboratoriyalarida ishlab chiqilayotgan boshqa maxfiy gadjetlar haqida ham to‘xtalib o‘tdi.
Ma’lumotlarga ko‘ra, Apple hozirda maxsus kameralar bilan jihozlangan quloqchinlar, aqlli ko‘zoynaklar va sensorli ekranli noutbuklar kabi noodatiy qurilmalar ustida izlanishlar olib bormoqda. Ushbu texnologiyalar kelajakda insonlarning kundalik hayot tarzini o‘zgartirishi kutilmoqda.
O‘z lavozimini tark etgan Tim Kuk yangi rahbarning salohiyatiga yuqori baho berdi. U o‘z xayrlashuv maktubida Jon Ternusni o‘ta qobiliyatli va yorqin mutaxassis deb atab, boshqaruv ishonchli qo‘llarga topshirilganini qayd etdi.
Kukning ta’kidlashicha, Ternus dunyoni o‘zgartiruvchi mahsulotlar yaratish falsafasini hamkashlaridan ko‘ra chuqurroq anglaydi va kompaniyani yangi zafarlar sari yetaklay oladi.
