Yangi iPhone 18 Pro suniy intellekt imkoniyatlari bo'yicha rekord o'rnatdi
Apple kompaniyasining bo‘lajak flagmani hisoblangan iPhone 18 Pro smartfoni sun’iy intellekt imkoniyatlarini bevosita qurilmaning o‘zida amalga oshirish bo‘yicha rekord natijalarni qayd etdi. Bu haqda One.uz xabar beradi.
Soha mutaxassisi Adriyen Grondin ushbu smartfonda 27 milliard parametrga ega bo‘lgan Bonsai-27B yirik til modelini masofaviy serverlarsiz, to‘liq lokal tarzda ishga tushirishga muvaffaq bo‘ldi. O‘tkazilgan sinovlar shuni ko‘rsatdiki, yangi qurilmaning matnli so‘rovlarni qayta ishlash tezligi o‘tgan avlod modelidan qariyb ikki baravar yuqori bo‘lib, bu mobil texnologiyalar olamida katta sakrash sifatida baholanmoqda.
Sinov jarayonida erishilgan ushbu yuqori samaradorlik, eng avvalo, qurilmaga o‘rnatilgan yangi avlod protsessori bilan bog‘liq. Mutaxassislarning fikricha, hisoblash quvvatining bunday keskin ortishi sun’iy intellekt modellarining ishlash sifatini tubdan yaxshilaydi.
Bu esa foydalanuvchilarga murakkab vazifalarni soniyalar ichida bajarish imkonini beradi. Yangi avlod protsessorining texnik quvvati Apple A20 Pro chipi mobil qurilmalar tarixida yangi sahifa ochmoqda.
Mazkur protsessor ilk bor ikkita 16 yadroli neyron hisoblash tizimi bilan jihozlangan bo‘lib, aynan shu arxitektura sun’iy intellekt vazifalarini bajarishda misli ko‘rilmagan unumdorlikni ta’minlaydi. Qurilmaning ichki tuzilmasidagi bunday o‘zgarishlar nafaqat tezlikni oshiradi, balki energiya sarfini ham samarali boshqarishga xizmat qiladi.
Shu bilan birga, qurilmaning xotira tizimi ham jiddiy yangilanishga yuz tutgan. iPhone 18 Pro va uning kattalashtirilgan talqini bo‘lgan Pro Max modellari 12 GB hajmdagi yuqori tezlikli LPDDR5X operativ xotirasi bilan ta’minlangan.
Ma’lumot uzatish shinasi 96 bitga yetkazilgani sababli, xotiraning o‘tkazish qobiliyati soniyasiga 115,2 gigabaytni tashkil etmoqda. Bu ko‘rsatkich yirik ma’lumotlar oqimini kechikishlarsiz qayta ishlash uchun xizmat qiladi.
Lokal sun’iy intellekt va maxfiylik Katta hajmli til modellarini ishga tushirishda xotira tezligi eng muhim omillardan biri sanaladi. Yangi smartfonning texnik imkoniyatlari sun’iy intellektni tashqi serverlarga bog‘lanmagan holda, bevosita telefonning o‘zida ishlatishga yo‘l ochadi.
Bu esa foydalanuvchi ma’lumotlarining xavfsizligini va shaxsiy daxlsizligini yangi bosqichga olib chiqadi, chunki barcha hisob-kitoblar qurilma ichida qoladi. Bonsai modeli bilan o‘tkazilgan muvaffaqiyatli tajribalar shuni tasdiqlaydiki, kelajakda murakkab intellektual so‘rovlarni internetga ulanmasdan bajarish odatiy holga aylanadi.
Mazkur texnologik yutuq mobil neyrotarmoqlar rivojida yangi davr boshlanganidan dalolat berib, smartfonlarni shunchaki aloqa vositasidan qudratli shaxsiy hisoblash markaziga aylantiradi.
