Vast kompaniyasi Oyni o'zlashtirish uchun yangi bo'linma tashkil etdi
Koinotda tijoriy orbital stansiyalarni loyihalash bilan shug‘ullanuvchi Vast kompaniyasi o‘z faoliyatini sezilarli darajada kengaytirib, Lunar Programs nomli yangi oy bo‘linmasi tashkil etilganini e’lon qildi. Bu haqda One.uz xabar beradi.
Ushbu tuzilma kompaniyaning koinot stansiyalari va sun’iy yo‘ldoshlar yaratish borasidagi boy tajribasini NASAning kelgusi oy dasturlarini amalga oshirishga yo‘naltirishni maqsad qilgan. Mazkur tashabbus Yer tabiiy yo‘ldoshini o‘zlashtirish va u yerda insoniyatning uzoq muddatli faoliyatini ta’minlash yo‘lidagi muhim qadam bo‘lishi kutilmoqda.
Vast bosh direktori Maks Xaotning ta’kidlashicha, korxonada milliy va xalqaro miqyosdagi strategik vazifalarni bajarish uchun barcha zaruriy texnik imkoniyatlar mavjud. Kompaniya yirik ishlab chiqarish quvvatlari va birinchi oy forpostini qurish uchun talab etiladigan muhandislik tajribasiga ega.
Rahbariyatning fikricha, loyihalash, ishlab chiqarish va sinov jarayonlarining o‘zaro uzviy bog‘liqligi bunday murakkab vazifalarni yuqori tezlik hamda ishonchlilik bilan bajarish imkonini beradi. Oy bazasini qurishning bosqichma-bosqich rejasi Kompaniya tomonidan ishlab chiqilgan oy arxitekturasi uchta asosiy bosqichga bo‘lingan.
Birinchi bosqich oy sirtiga xavfsiz qo‘nishni ta’minlash, asosiy infratuzilmani o‘rnatish va texnologik xavflarni kamaytirishga qaratilgan sinovlarni o‘z ichiga oladi. Ikkinchi bosqichda ekipaj a’zolarining yashashi va ishlashi uchun zarur tizimlar bilan jihozlangan dastlabki oy bazasi elementlarini qurish ishlari amalga oshiriladi.
Uchinchi va yakuniy bosqich insonning Oydagi doimiy hamda barqaror faoliyatini ta’minlaydigan keng ko‘lamli infratuzilmani to‘liq ishga tushirishni ko‘zda tutadi. Mutaxassislarning fikriga ko‘ra, bunday tizimli yondashuv loyihaning xavfsizlik darajasini oshiradi va har bir texnologik jarayonning puxta bajarilishini kafolatlaydi.
Bu esa kelajakda Oydan ilmiy va sanoat maqsadlarida foydalanish uchun mustahkam zamin yaratadi. Yangi texnologiyalar va texnik yechimlar E’tiborli jihati shundaki, oy tizimlari uchun zarur bo‘lgan ko‘plab ishlanmalar hozirgi kunda Haven orbital stansiyasi modullarini yaratish jarayonida sinovdan o‘tkazilmoqda.
Har bir yangi modul avvalgisining yanada takomillashgan nusxasi bo‘lib, oy stansiyalari ham aynan shu tamoyil asosida muntazam yangilanib boradi. Ushbu usul moliyaviy xarajatlarni qisqartirish va texnologik tayyorgarlik muddatini tezlashtirish imkonini beradi.
Kompaniya portfelidan quyosh energiyasini generatsiya qilish va to‘plash moslamalariga ega zamonaviy energetika stansiyasi o‘rin olgan. Shuningdek, oy changidan himoyalangan hamda fazogirlarning maxsus kiyimlari bilan to‘liq mos keluvchi avtonom havo shlyuzlari ishlab chiqilmoqda.
Loyiha doirasida hayotni ta’minlash, haroratni boshqarish va aloqa tizimlarini o‘z ichiga olgan ko‘p modulli yashash majmualari hamda Oyning janubiy qutbini uzluksiz aloqa bilan qamrab oluvchi sun’iy yo‘ldoshlar tarmog‘ini yaratish ko‘zda tutilgan.
