Amerikaning Starcloud startapi koinotda bitkoin mayningini yo'lga qo'yadi
NVIDIA kompaniyasi ko‘magida faoliyat yurituvchi Amerikaning Starcloud startapi joriy yil yakuniga qadar Yer orbitasida bitkoin mayningini, ya’ni raqamli valyuta qazib olish jarayonini yo‘lga qo‘yishini ma’lum qildi. Bu haqda One.uz xabar beradi.
Ushbu loyiha amalga oshsa, Starcloud koinotda kriptovalyuta ishlab chiqarishni boshlagan dunyodagi ilk kompaniyaga aylanadi. Mazkur innovatsion qadam nafaqat kosmik texnologiyalar, balki moliya va yuqori texnologiyalar sohasida ham yangi davrni boshlab berishi kutilmoqda.
Kompaniya vakillarining ma’lumotlariga ko‘ra, maxsus hisoblash qurilmalari Starcloud-2 sun’iy yo‘ldoshiga o‘rnatiladi. Loyiha rahbari Filipp Jonstonning ta’kidlashicha, ushbu missiya koinotda kriptovalyuta qazib olish bo‘yicha mutlaq kashshoflik vazifasini bajaradi.
Dastlab Starcloud sun’iy intellekt tizimlariga xizmat ko‘rsatuvchi orbital ma’lumotlar markazlarini yaratishni rejalashtirgan edi, biroq keyinchalik kriptovalyuta hisob-kitoblari ham asosiy yo‘nalishlardan biri sifatida tanlab olindi. Koinotdagi ma’lumotlar markazlari Sun’iy yo‘ldosh bortiga faqat mayning chiplari emas, balki kuchli grafik tezlatgichlar klasteri ham joylashtiriladi.
Bu koinotda nafaqat raqamli aktivlarni yaratish, balki boshqa murakkab va katta energiya talab qiladigan vazifalarni ham masofadan turib bajarish imkonini beradi. Mutaxassislar orbital hisob-kitoblarning asosiy afzalligi sifatida quyosh energiyasidan uzluksiz foydalanish imkoniyatini ko‘rsatmoqdalar.
Yer yuzidagi yirik ma’lumotlar markazlari hozirda joy yetishmasligi va elektr energiyasi infratuzilmasidagi cheklovlar tufayli muammolarga duch kelmoqda. Koinotda esa bunday to‘siqlar mavjud emas.
Filipp Jonstonning fikricha, bitkoin mayningi orbital texnologiyalar uchun iqtisodiy jihatdan eng foydali yo‘nalishlardan biri bo‘lishi mumkin. Masalan, bir xil quvvat sarflaydigan grafik tezlatgichlar va mayning qurilmalari narxi o‘rtasidagi farq koinotdagi loyihalarni tezroq oqlashga xizmat qiladi.
Texnik muammolar va yechimlar Shunga qaramay, loyihani amalga oshirishda jiddiy muhandislik qiyinchiliklari mavjud. Ochiq koinot sharoitida, ya’ni vakuumda an’anaviy havo sovutish tizimlari ishlamaydi.
Shuningdek, orbitaga chiqarilgan uskunalarni ta’mirlash yoki almashtirishning imkoni yo‘q. Shu sababli, mutaxassislar issiqlikni chiqarib yuboruvchi maxsus radiatorlar va murakkab termoregulyatsiya tizimlarini ishlab chiqishgan.
Starcloud kompaniyasi kosmik ma’lumotlar markazlarining chidamliligi va samaradorligini sinab ko‘rish uchun jami to‘rtta orbital missiyani amalga oshirishni rejalashtirgan. Dastlabki bosqichda kriptovalyuta tajribasi loyihaning bir qismi sifatida ko‘rilmagan bo‘lsa-da, hozirda u asosiy texnologik sinov maydoniga aylangan.
Ushbu tashabbus kelajakda koinotdan turib global miqyosdagi hisoblash ishlarini boshqarishga poydevor yaratadi.
